अथर्ववेदः/काण्डं ६/सूक्तम् ०१९

by ऋषिः - शन्तातिः।

← सूक्तं ६.०१८

अथर्ववेदः - काण्डं ६ सूक्तं ६.०१९ ऋषिः - शन्तातिः।

सूक्तं ६.०२० →

दे. चन्द्रमाः, १ देवजनाः, मनवः, विश्वा भूतानि, पवमानः, २ पवमानः, ३ सविता। गायत्री, १ अनुष्टुप् ।

पुनन्तु मा देवजनाः पुनन्तु मनवो धिया ।
पुनन्तु विश्वा भूतानि पवमानः पुनातु मा ॥१॥
पवमानः पुनातु मा क्रत्वे दक्षाय जीवसे ।
अथो अरिष्टतातये ॥२॥
उभाभ्यां देव सवितः पवित्रेण सवेन च ।
अस्मान् पुनीहि चक्षसे ॥३॥