लेख्यसाक्ष्योः मध्ये लेख्यस्य प्राबल्यम्.
लेख्यप्राबल्यमाह संवर्तः--
"लेख्यस्योपरि यत्साक्ष्यं कूटं तदभिधीयते ।
अधर्मस्य हि तद्द्वारं ततो राजा निवर्तयेत्" ॥
बृहस्पतिरपि--
"वाचकैर्यत्र सामर्थ्यमक्षराणां विहन्यते ।
क्रियाणां सर्वनाशस्स्यादनवस्था च जायते" ॥
क्रियाणां लेख्यक्रियाणाम् । कात्यायनोऽपि--
"न दिव्यैस्साक्षिभिर्वाऽपि हीयते लिखितं क्वचित् ।
लेख्यधर्मस्सदा [१]श्रेष्ठो ह्यतो नान्येन हीयते" ॥
लेख्येन तु हीयत इत्याह स एव--
"तद्युक्तः प्रतिलेख्येन तद्विशिष्टेन वा सदा ।
लेख्यक्रिया निरस्येत निरस्यान्येन न क्वचित्" ॥
अन्येन साक्ष्यादिनेत्यर्थः । अत्र विशेषमाह व्यासः--
"अदृष्टं श्रावितं लेख्यं प्रमीतधनिकर्णिकम् ।
अबन्धलग्नकं चैव बहुकालं न सिध्यति ॥"
अत्र न सिध्यतीत्येतत् पुरस्तात् "पश्यतोऽब्रुवतो भूमेः" इत्यादिवचनव्याख्यानावसरे निवेदयिष्यामः ।
भुक्तेरपि निर्णायकत्वम्.
भुक्तेरपि निर्णायकत्वमाह नारदः--
"कृत्वोत्तरं क्रियावादे लेख्यं साधनमुद्दिशेत् ।
सामन्तलक्षणोपेता भुक्तिर्वा चिरकालिकी" ॥
- ↑ श्रेष्ठस्तेन.
