गाहासत्तसई सप्तमशतकम्

विकिस्रोतः तः

गाहासत्तसई


अकअण्णुअ घणवण्णं घणवण्णंतरिअतरणिअरणिअरं / गाहा६०१कख
जइ रे रे वाणीरं रेवाणीरं पि णो भरसि / गाहा६०१गघ

मंदं पि ण आणइ हलिअणंदणो इह हि डड्ढगामम्मि / गाहा६०२कख
गहवइसुआ विवज्जइ अवेज्जए कस्स साहामो / गाहा६०२गघ

एक्कक्कमपरिरक्खणपहारसमुहे कुरंगमिहुणम्मि / गाहा६०३कख
वाहेण मण्णुविअलंतवाहधोअं धणुं मुक्कं / गाहा६०३गघ

ता सुहअ विलंव खणं भणामि कीअ वि कएण अलम् अहवा / गाहा६०४कख
अविआरिअकज्जारंभआरिणी मरउ ण भणिस्सं / गाहा६०४गघ

भोइणिदिण्णपहेणअचक्खिअदुस्सिक्खिओ हलिअउत्तो / गाहा६०५कख
एत्ताहे अण्णपहेणआण छीवोल्लअं देइ / गाहा६०५गघ

पच्चूसमऊहावलिपरिमलणसमूससंतवत्ताणं / गाहा६०६कख
कमलाण रअणिविरमे जिअलोअसिरी महंमहइ / गाहा६०६गघ

वाउव्वेल्लिअसाहुलि थएसु फुडदंतमंडलं जहणं / गाहा६०७कख
चडुआरअं पइं मा हु पुत्ति जणहासिअं कुणसु / गाहा६०७गघ

वीसत्थहसिअपरिसक्किआण पढमं जलंजली दिण्णो / गाहा६०८कख
पच्छा वहूअ गहिओ कुडंवभारो णिमज्जंतो / गाहा६०८गघ

गम्मिहिसि तस्स पासं सुंदरि मा तुअर वड्ढउ मिअंको / गाहा६०९कख
दुद्धे दुद्धं मिव चंदिआइ को पेच्छइ मुहं दे / गाहा६०९गघ

जइ जूरइ जूरउ णाम मामि परलोअवसणिओ लोओ / गाहा६१०कख
तह वि वला गामणिणंदणस्स वअणे वलइ दिट्ठी / गाहा६१०गघ

गेहं व वित्तरहिअं णिज्झरकुहरं व सलिलसुण्णइअं / गाहा६११कख
गोहणरहिअं गोट्ठं व तीअ वअणं तुह विओए / गाहा६११गघ

तुह दंसणेण जणिओ इमीअ लज्जाउलाइ अणुराओ / गाहा६१२कख
दुग्गअमणोरहो विअ हिअअ च्चिअ जाइ परिणामं / गाहा६१२गघ

जं तणुआअइ सा तुह कएण किं जेण पुच्छसि हसंतो / गाहा६१३कख
अह गिम्हे मह पअई एव्वं भणिऊण ओरुण्णा / गाहा६१३गघ

वण्णक्कमरहिअस्स वि एस गुणो णवरि चित्तकम्मस्स / गाहा६१४कख
णिमिसं पि जं ण मुंचइ पिओ जणो गाढम् उवऊढो / गाहा६१४गघ

अविहत्तसंधिवंधं पढमरसुब्भेअपाणलोहिल्लो / गाहा६१५कख
उव्वेल्लिउं ण आणइ खंडइ कलिआमुहं भमरो / गाहा६१५गघ

दरवेविरोरुजुअलासु मउलिअच्छीसु लुलिअचिहुरासु / गाहा६१६कख
पुरिसाइरीसु कामो पिआसु सज्जाउहो होइ / गाहा६१६गघ

जं जं ते ण सुहाअइ तं तं ण करेमि जं मम्ऽ आअत्तं / गाहा६१७कख
अहअं चिअ जं ण सुहामि सुहअ तं किं मम्ऽ आअत्तं / गाहा६१७गघ

वावारविसंवाअं सअलावअवाण कुणइ हअलज्जा / गाहा६१८कख
सवणाण उणो गुरुसंणिहे वि ण णिरुंझइ णिओअं / गाहा६१८गघ

किं भणह मं सहीओ मा मर दीसिहइ सो जिअंतीए / गाहा६१९कख
कज्जालाओ एसो सिणेहमग्गो उण ण होइ / गाहा६१९गघ

एक्कल्लमओ दिट्ठीअ मइअ तह पुलइओ सअण्हाए / गाहा६२०कख
पिअजाअस्स जह धणुं पडिअं वाहस्स हत्थाओ / गाहा६२०गघ

णलिणीसु भमसि परिमलसि सत्तलं मालइं पि णो मुअसि / गाहा६२१कख
तरलत्तणं तुह अहो महुअर जइ पाडला हरइ / गाहा६२१गघ

दोअंगुलअकवालअपिणद्धसविसेसणीलकंचुइआ / गाहा६२२कख
दावेइ थणत्थलवण्णिअं व तरुणी जुअजणाणं / गाहा६२२गघ

रक्खेइ पुत्तअं मत्थएण ओच्छोअअं पडिच्छंती / गाहा६२३कख
अंसूहि पहिअघरिणी ओल्लिज्जंतं ण लक्खेइ / गाहा६२३गघ

सरए सरम्मि पहिआ जलाइ कंदोट्टसुरहिगंधाइ / गाहा६२४कख
धवलच्छाइ सअण्हा पिअंति दइआण व मुहाइं / गाहा६२४गघ

अब्भंतरसरसाओ उवरिं पव्वाअवद्धपंकाओ / गाहा६२५कख
चंकम्मंतम्मि जणे समूससंति व्व रच्छाओ / गाहा६२५गघ

मुहपुंडरीअछाआइ संठिए उअह राअहंसे व्व / गाहा६२६कख
छणपिट्ठकुट्टणुच्छलिअधूलिधवले थणे वहइ / गाहा६२६गघ

तह तेण वि सा दिट्ठा तीअ वि तह तस्स पेसिआ दिट्ठी / गाहा६२७कख
जह दोण्ह वि समअं चिअ णिव्वुत्तरआइ जाआइ / गाहा६२७गघ

वाउलिआपरिसोसणणिउंजपत्तलणसुलहसंकेआ / गाहा६२८कख
सोहग्गकणअकसवट्ट गिम्ह मा कह वि झिज्जिहिसि / गाहा६२८गघ

दुस्सिक्खिअरअणपसिक्खएहि घिट्ठो सि पत्थरे ताव / गाहा६२९कख
जा तिलमेत्तं वट्टसि मरगअ का तुज्झ मुल्लकहा / गाहा६२९गघ

जह चिंतेइ परिअणो आसंकइ जह अ तस्स पडिवक्खो / गाहा६३०कख
वालेण वि गामणिणंदणेण तह रक्खिआ पल्ली / गाहा६३०गघ

अण्णेसु पहिअ पुच्छसु वाहअपुत्तेसु पुसिअचम्माइं / गाहा६३१कख
अम्हं वाहजुआणो हरिणेसु धणुं ण णामेइ / गाहा६३१गघ

गअवहुवेहव्वअरो पुत्तो मे एक्ककंडविणिवाई / गाहा६३२कख
तह सोण्हाइ पुलइओ जह कंडवरंडअं वहइ / गाहा६३२गघ

विंझारुहणालावं पल्ली मा कुणउ गामणी ससइ / गाहा६३३कख
पच्चुज्जिविओ जइ कह वि सुणइ ता जीविअं मुअइ / गाहा६३३गघ

अप्पाहेइ मरंतो पुत्तं पल्लीवई पअत्तेण / गाहा६३४कख
मह णामेण जह तुमं ण लज्जसे तह करेज्जासु / गाहा६३४गघ

अणुमरणपत्थिआए पच्चागअजीविए पिअअमम्मि / गाहा६३५कख
वेहव्वमंडणं कुलवहूअ सोहग्गअं जाअं / गाहा६३५गघ

महुमच्छिआइ दट्ठं दट्ठूण मुहं पिअस्स सूणोट्ठं / गाहा६३६कख
ईसालुई पुलिंदी रुक्खच्छाअं गआ अण्णं / गाहा६३६गघ

धण्णा वसंति णीसंकमोहणे वहलपत्तलवइम्मि / गाहा६३७कख
वाअंदोलणओणविअवेणुगहणे गिरिग्गामे / गाहा६३७गघ

पुप्फुल्लघणकलंवा णिद्धोअसिलाअला मुइअमोरा / गाहा६३८कख
पसरंतोज्झरमुहला उच्छाहंते गिरिग्गामा / गाहा६३८गघ

तह परिमलिआ गोवेण तेण हत्थं पि जा ण ओल्लेइ / गाहा६३९कख
स च्चिअ खडणा एण्हिं पेच्छह कुडदोहिणी जाआ / गाहा६३९गघ

धवलो जिअइ तुह कए धवलस्स कए जिअंति गिट्ठीओ / गाहा६४०कख
जिअ तंवे अम्ह वि जीविएण गोट्ठं तुमाअत्तं / गाहा६४०गघ

अग्घाइ छिवइ चुंवइ ठवेइ हिअअम्मि जणिअरोमंचो / गाहा६४१कख
जाआकवोलसरिसं पेच्छह पहिओ महुअपुप्फं / गाहा६४१गघ

उअ ओल्लिज्जइ मोहं भुअंगकित्तीअ कडअलग्गाइ / गाहा६४२कख
ओज्झरधारासद्धालुएण सीसं वणगएण / गाहा६४२गघ

कमलं मुअंत महुअर पिक्ककइत्थाण गंधलोहेण / गाहा६४३कख
आलेक्खलड्डुअं पामरो व्व छिविऊण जाणिहिसि / गाहा६४३गघ

गिज्जंते मंगलगाइआहि वरगोत्तदिण्णअण्णाए / गाहा६४४कख
सोउं व णिग्गओ उअह होंतवहुआइ रोमंचो / गाहा६४४गघ

मण्णे आअण्णंता आसण्णविवाहमंगलुग्गीअं / गाहा६४५कख
तेहि जुआणेहि समं हसंति मं वेअसकुडुंगा / गाहा६४५गघ

उअगअचउत्थिमंगलहोंतविओअसविसेसलग्गेहि / गाहा६४६कख
तीअ वरस्स अ सेअंसुएहि रुण्णं व हत्थेहिं / गाहा६४६गघ

ण अ दिट्ठिं णेइ मुहं ण अ छिविउं देइ णा लवइ किं पि / गाहा६४७कख
तह वि हु किं पि रहस्सं णववहुसंगो पिओ होइ / गाहा६४७गघ

अलिअपसुत्तवलंतम्मि णववरे णववहूअ वेवंतो / गाहा६४८कख
संवेल्लिओरुसंजमिअवत्थगंठिं गओ हत्थो / गाहा६४८गघ

पुच्छिज्जंती ण भणइ गहिआ पप्फुरइ चुंविआ रुअइ / गाहा६४९कख
तुण्हिक्का णववहुआ कआवराहेण उवऊढा / गाहा६४९गघ

तत्तो च्चिअ होंति कहा विअसंति तहिं तहिं समप्पंति / गाहा६५०कख
किं मण्णे माउच्छा एक्कजुआणो इमो गामो / गाहा६५०गघ

जाइ वअणाइ अम्हे वि जंपिमो ताइ जंपइ जणो वि / गाहा६५१कख
ताइं चिअ तेण पजंपिआइ हिअअं सुहावेंति / गाहा६५१गघ

सव्वाअरेण मग्गह पिअं जणं जइ सुहेण वो कज्जं / गाहा६५२कख
जं जस्स हिअअदइअं तं ण सुहं जं तहिं ण त्थि / गाहा६५२गघ

दीसंतो दिट्ठिसुहो चिंतिज्जंत मणवल्लहो अत्ता / गाहा६५३कख
उल्लावंत सुइसुहो पिओ जणो णिच्च रमणिज्जो / गाहा६५३गघ

ठाणब्भट्ठा परिगलिअपीणआ उण्णईअ परिचत्ता / गाहा६५४कख
अम्हे उण ठेरिपओहर व्व उअरे च्चिअ णिसन्णा / गाहा६५४गघ

पच्चूसागअ रंजिअदेह पिआलोअ लोअणाणंद / गाहा६५५कख
अण्णत्तखविअसव्वरि णहभूसण दिणवइ णमो दे / गाहा६५५गघ

विवरीअसुरअलेहड पुच्छसि मह कीस गब्भसंभूइं / गाहा६५६कख
ओअत्ते कुंभमुहे जललवकणिआ वि किं ठाइ / गाहा६५६गघ

अच्चासण्णविवाहे समं जसोआइ तरुणगोवीहिं / गाहा६५७कख
वड्ढंते महुमहणे संवंधा णिण्हुविज्जंति / गाहा६५७गघ

जं जं आलिहइ मणो आसावत्तीहि हिअअफलअम्मि / गाहा६५८कख
तं तं वालो व्व विही णिहुअं हसिऊण पम्हुसइ / गाहा६५८गघ

अणुहुत्तो करफंसो सअलअलापुण्ण पुण्णदिअहम्मि / गाहा६५९कख
वीआसंगकिसंगअ एण्हिं तुह वंदिमो चलणे / गाहा६५९गघ

दूरंतरिए वि पिए कह वि णिअत्ताइ मज्झ णअणाइ / गाहा६६०कख
हिअअं उण तेण समं अज्ज वि अणिवारिअं भमइ / गाहा६६०गघ

तस्स कहाकंतइए सद्दाअण्णणसमोसरिअकोवे / गाहा६६१कख
समुहालोअणकंपिरि उवऊढा किं पवज्जिहिसि / गाहा६६१गघ

भरणमिअणीलसाहग्गखलिअचलणद्धविहुअवक्खउडा / गाहा६६२कख
तरुसिहरेसु विहंगा कह कह वि लहंति संठाणं / गाहा६६२गघ

अहरमहुपाणघोरिल्लिआइ जं च रमिओ सि सविसेसं / गाहा६६३कख
असइ अलज्जिरि वहुसिक्खिरि त्ति मा णाह मण्णिहिसि / गाहा६६३गघ

खाणेण अ पाणेण अ तह गहिओ मंडलो अडअणाइ / गाहा६६४कख
जह जारं अहिणंदइ भुक्कइ घरसामिए एंते / गाहा६६४गघ

कंडंतेण अकंडं पल्लीमज्झम्मि विअडकोअंदं / गाहा६६५कख
पइमरणाहि वि अहिअं वाहेण रुआविआ अत्ता / गाहा६६५गघ

अम्हे उज्जुअसीला पिओ वि पिअसहि विआरपरिओसो / गाहा६६६कख
ण हु अण्णा का वि गई वाहोहा कह पुसिज्जंतु / गाहा६६६गघ

धवलो सि जइ वि सुंदरि तह वि तुए मज्झ रंजिअं हिअअं / गाहा६६७कख
राअभरिए वि हिअए सुहअ णिहित्तो ण रत्तो सि / गाहा६६७गघ

चंचुपुडाहअविअलिअसहआररसेण सित्तदेहस्स / गाहा६६८कख
कीरस्स मग्गलग्गं गंधंधं भमइ भमरउलं / गाहा६६८गघ

एत्थ णिमज्जइ एत्ता एत्थ अहं एत्थ परिअणो सअलो / गाहा६६९कख
पंथिअ रत्तीअंधअ मा मह सअणे णिमज्जिहिसि / गाहा६६९गघ

परिओससुंदराइं सुरएसु लहंति जाइ सोक्खाइ / गाहा६७०कख
ताइं चिअ उण विरहे खाउग्गिण्णाइ कीरंति / गाहा६७०गघ

मग्गं चिअ अलहंतो हारो पीणुण्णआण थणआण / गाहा६७१कख
उव्विग्गो भमइ उरे जमुणाणइफेणपुंजो व्व / गाहा६७१गघ

एक्केण वि वडवीअंकुरेण सअलवणराइमज्झम्मि / गाहा६७२कख
तह तेण कओ अप्पा जह सेसदुमा तले तस्स / गाहा६७२गघ

जे जे गुणिणो जे जे अ चाइणो जे विअड्ढविण्णाणा / गाहा६७३कख
दारिद्द रे विअक्खण ताण तुमं साणुराओ सि / गाहा६७३गघ

जइ कोत्तिओ सि सुंदर सअलतिहीचंददंसणसुहाणं / गाहा६७४कख
ता मसिणं मोइज्जंतकंचुअं पेक्खसु मुहं से / गाहा६७४गघ

समविसमणिव्विसेसा समंतओ मंदमंदसंचारा / गाहा६७५कख
अइरा होहिंति पहा मणोरहाणं पि दुल्लंघा / गाहा६७५गघ

अइदीहराइ वहुए सीसे दीसंति वंसवत्ताइ / गाहा६७६कख
भणिए भणामि अत्ता तुम्हाण वि पंडरा पुट्ठी / गाहा६७६गघ

अत्थक्करूसणं खणपसिज्जणं अलिअवअणणिव्वंधो / गाहा६७७कख
उम्मच्छरसंतावो पुत्तअ पअवी सिणेहस्स / गाहा६७७गघ

पिज्जइ कण्णंजलिहिं जणरवमिलिअं पि तुज्झ संलावं / गाहा६७८कख
दुद्धं जलसम्मिलिअं सा वाला राअहंसि व्व / गाहा६७८गघ

अइ उज्जुए ण लज्जसि पुच्छिज्जंती पिअस्स चरिआइं / गाहा६७९कख
सव्वंगसुरहिणो मरुवअस्स किं कुसुमरिद्धीहि / गाहा६७९गघ

मुद्धे अपत्तिअंती पवालअंकुरअणिद्धलोहिअए / गाहा६८०कख
णिद्धोअधाउराए कीस सहत्थे पुणो धुअसि / गाहा६८०गघ

उअ सिंधवपव्वअसच्छहाइ धुअतूलपुंजसरिसाइं / गाहा६८१कख
सोहंति सुअणु मुक्कोअआइ सरए सिअब्भाइं / गाहा६८१गघ

आउच्छंति सिरेहि विवलिएहि उअ खडिएहि णिज्जंता / गाहा६८२कख
णिप्पच्छिमवलिअपलोइएहि महिसा कुडंगाइ / गाहा६८२गघ

पुससु मुहं ता पुत्तिअ वाहोअरणं विसेसरमणिज्जं / गाहा६८३कख
मा एअं चिअ मुहमंडणं ति सो काहिइ पुणो वि / गाहा६८३गघ

मज्झे पअणुअपंकं अवहोवासेसु साणचिक्खिल्लं / गाहा६८४कख
गामस्स सीससीमंतअं व रच्छामुहं जाअं / गाहा६८४गघ

अवरण्हागअजामाउअस्स विउणेइ मोहणुक्कंठं / गाहा६८५कख
वहुआइ घरपलोहरमज्जणपिसुणो वलअसद्दो / गाहा६८५गघ

जुज्झचवेडामोडिअजज्जरकण्णस्स जुण्णमल्लस्स / गाहा६८६कख
कच्छावंधो च्चिअ भीरुमल्लहिअअं समुक्खणइ / गाहा६८६गघ

आणंदंतेन तुमं पइणो पहएण पडहसद्देण / गाहा६८७कख
मल्लि ण लज्जसि णच्चसि दोहग्गे पाअडिज्जंते / गाहा६८७गघ

मा वच्चह वीसंभं इमाण वहुचाडुअम्मणिउणाणं / गाहा६८८कख
णिव्वत्तिअकज्जपरम्मुहाण सुणआण व खलाणं / गाहा६८८गघ

अण्णग्गामपउत्था कड्ढंती मंडलाण रिंछोलिं / गाहा६८९कख
अक्खंडिअसोहग्गा वरिससअं जिअउ मे सुणिआ / गाहा६८९गघ

सच्चं साहसु देअर तह तह चडुआरएण सुणएण / गाहा६९०कख
णिव्वत्तिअकज्जपरम्मुहत्तणं सिक्खिअं कत्तो / गाहा६९०गघ

णिप्पण्णसस्सरिद्धी सच्छंदं गाइ पामरो सरए / गाहा६९१कख
दलिअणवसालितंडुलधवलमिअंकासु राईसु / गाहा६९१गघ

अलिहिज्जइ पंकअले हलालिचलणेण कलमगोवीए / गाहा६९२कख
केआरसोअरुंभणतंसट्ठिअकोमलो चलणो / गाहा६९२गघ

दिअहे दिअहे सूसइ संकेअअभंगवड्ढिआसंका / गाहा६९३कख
आवंडुरोणअमुही कलमेण समं कलमगोवी / गाहा६९३गघ

णवकम्मिएण उअ पामरेण दट्ठूण पाउहारीओ / गाहा६९४कख
मोत्तव्वे जोत्तअपग्गहम्मि अवहासिणी मुक्का / गाहा६९४गघ

दट्ठूण हरिअदीहं गोसे संढाण जूरए हलिओ / गाहा६९५कख
असईरहस्समग्गं तुसारधवले तिलच्छेत्ते / गाहा६९५गघ

संकेल्लिओ व्व णिज्जइ खंडं खंडं कओ व्व पीओ व्व / गाहा६९६कख
वासागमम्मि मग्गो घरहुत्तमुहेण पहिएण / गाहा६९६गघ

संझागहिअजलंजलिपडिमासंकंतगोरिमुहकमलं / गाहा६९७कख
अलिअं चिअ फुरिओट्ठं विअलिअमंतं हरं णमह / गाहा६९७गघ

इअ सिरिहालविरइए पाउअकव्वम्मि सत्तसए / गाहा६९८कख
सत्तमसअं समत्तं गाहाण सहावरमणिज्जं / गाहा६९८गघ

एण्हिं वारेइ जणो तइआ मूइल्लओ कहिं व गओ / गाहा६९९कख
जाहे विसं व जाअं सव्वंगपहोलिरं पेम्मं / गाहा६९९गघ

कह तं पि तुइ ण णाअं जह सा आसंदिआण वहुआणं / गाहा७००कख
काऊण उच्चवचिअं तुह दंसणलेहडा पडिआ / गाहा७००गघ