गाहासत्तसई पञ्चमशतकम्

विकिस्रोतः तः

गाहासत्तसई


डज्झसि डज्झसु कुत्थसि कुत्थसु अह फुडसि हिअअ ता फुडसु / गाहा४०१कख
तह वि परिसेसिओ च्चिअ सो खु मए गलिअसब्भावो / गाहा४०१गघ

दट्ठूण रंदतुंडग्गणिग्गअं णिअसुअस्स दाढग्गं / गाहा४०२कख
भोंडी विणा वि कज्जेण गामणिअडे जवे चरइ / गाहा४०२गघ

हेलाकरग्गकड्ढिअजलरिक्कं साअरं पआसंतो / गाहा४०३कख
जअइ अणिग्गहवडवग्गिभरिअगअणो गणाहिवई / गाहा४०३गघ

एएण च्चिअ कंकेल्लि तुज्झ तं ण त्थि जं ण पज्जत्तं / गाहा४०४कख
उवमिज्जइ जं तुह पल्लवेण वरकामिणीहत्थो / गाहा४०४गघ

रसिअ विअड्ढ विलासिअ समअण्णुअ सच्चअं असोओ सि / गाहा४०५कख
वरजुवइचलणकमलाहओ वि जं विअससि सअण्हं / गाहा४०५गघ

वलिणो वाआवंहे चोज्जं णिउणत्तणं च पअडंतो / गाहा४०६कख
सुरसत्थकआणंदो वामणरूवो हरी जअइ / गाहा४०६गघ

विज्झाविज्जइ जलणो गहवइधूआइ वित्थअसिहो वि / गाहा४०७कख
अणुमरणघणालिंगणपिअअमसुहसिज्जिरंगीए / गाहा४०७गघ

जारमसाणसमुब्भवभूइसुहप्फंससिज्जिरंगीए / गाहा४०८कख
ण समप्पइ णवकावालिणीअ उद्धूलणारंभो / गाहा४०८गघ

एक्को पण्हअइ थणो वीओ पुलएइ णहमुहालिहिओ / गाहा४०९कख
पुत्तस्स पिअअमस्स अ मज्झणिसण्णाइ घरिणीअ / गाहा४०९गघ

एत्ताइ च्चिअ मोहं जणेइ वालत्तणे वि वट्टंती / गाहा४१०कख
गामणिधुआ विसलअ व्व वड्ढिआ काहिइ अणत्थं / गाहा४१०गघ

अपहुप्पंतं महिमंडलम्मि णहसंठिअं चिरं हरिणो / गाहा४११कख
ताराउप्फप्पअरंचिअं व तइअं पअं णमह / गाहा४११गघ

सुप्पउ तइओ वि गओ जामो त्ति सहीउ कीस मं भणह / गाहा४१२कख
सेहालिआण गंधो ण देइ सोत्तुं सुअह तुम्हे / गाहा४१२गघ

कह सो ण संभरिज्जइ जो मे तह संठिआइ अंगाइं / गाहा४१३कख
णिव्वत्तिए वि सुरए णिज्झाअइ सुरअरसिओ व्व / गाहा४१३गघ

सुक्खंतवहलकद्दमघम्मविसूरंतकमढपाढीणं / गाहा४१४कख
दिट्ठं अइट्ठउव्वं कालेण तलं तडाअस्स / गाहा४१४गघ

चोरिअरअसद्धालुणि मा पुत्ति भम्मसु अंधआरम्मि / गाहा४१५कख
अहिअअरं लक्खिज्जसि तमभरिए दीवअसिह व्व / गाहा४१५गघ

वाहित्ता पडिवअणं ण देइ रूसेइ एक्कमेक्कस्स / गाहा४१६कख
असई कज्जेण विणा पलिप्पमाणे णईकच्छे / गाहा४१६गघ

आम असइ म्ह ओसर पइव्वए ण तुह मइलिअं गोत्तं / गाहा४१७कख
किं उण जणस्स जाअ व्व चंडिलं ता ण कामेमो / गाहा४१७गघ

णिद्दं लहंति कहिअं सुणंति खलिअक्खरं ण जंपंति / गाहा४१८कख
जाहि ण दिट्ठो सि तुमं ताओ च्चिअ सुहअ सुहिआओ / गाहा४१८गघ

वालअ तुमाइ दिण्णं कण्णे काऊण वोरसंघाडिं / गाहा४१९कख
लज्जालुइणी वि वहू घरं गआ गामरच्छाए / गाहा४१९गघ

अह सो विलक्खहिअओ मए अहव्वाइ अगहिआणुणओ / गाहा४२०कख
परवज्जणच्चिरीहिं तुम्हेहि उवेक्खिओ णिंतो / गाहा४२०गघ

दीसंतो णअणसुहो णिव्वुदिजणणो करेहि वि छिवंतो / गाहा४२१कख
अब्भत्थिओ ण लब्भइ चंदो व्व पिओ कलाणिलओ / गाहा४२१गघ

जे लीणभमरभरभग्गगोच्छआ आसि णइअडुच्छंगे / गाहा४२२कख
कालेण वंजुला पिअवअस्स ते खण्णुआ जाआ / गाहा४२२गघ

खणभंगुरेण पेम्मेण माउआ दूमिअ म्हि एत्ताहे / गाहा४२३कख
सिविणअणिहिलंभेण व दिट्ठपणट्ठेण लोअम्मि / गाहा४२३गघ

चाओ सहावसरलं विच्छुहइ सरं गुणम्मि णिवडंतं / गाहा४२४कख
वंकस्स उज्जुअस्स अ संवंधो किं चिरं होइ / गाहा४२४गघ

पढमं वामणविहिणा पच्छा हु कओ विअंभमाणेण / गाहा४२५कख
थणजुअलेण इमीए महुमहणेण व्व वलिवंधो / गाहा४२५गघ

मालइकुसुमाइ कुलुंचिऊण मा जाण णिव्वुओ सिसिरो / गाहा४२६कख
काअव्वा अज्ज वि णिग्गुणाण कुंदाण सामिद्धी / गाहा४२६गघ

तुंगाण विसेसणिरंतराण सरसवणलद्धसोहाणं / गाहा४२७कख
कअकज्जाण भडाण व थणाण पडणं पि रमणिज्जं / गाहा४२७गघ

परिमलणसुहा गरुआ अलद्धविवरा सलक्खणाहरणा / गाहा४२८कख
थणआ कव्वालाअ व्व कस्स हिअए ण लग्गंति / गाहा४२८गघ

खिप्पइ हारो थणमंडलाहि तरुणीहि रमणपरिरंभे / गाहा४२९कख
अच्चिअगुणा वि गुणिणो लहंति लहुअत्तणं काले / गाहा४२९गघ

अण्णो को वि सहावो वम्महसिहिणो हला हआसस्स / गाहा४३०कख
विज्झाइ णीरसाणं हिअए सरसाण पज्जलइ / गाहा४३०गघ

तह तस्स माणपरिवड्ढिअस्स चिरपणअवद्धमूलस्स / गाहा४३१कख
मामि पडंतस्स सुओ सद्दो वि ण पेम्मरुक्खस्स / गाहा४३१गघ

पाअपडिओ ण गणिओ पिअं भणंतो वि अप्पिअं भणिओ / गाहा४३२कख
वच्चंतो वि ण रुद्धो भण कस्स कए कओ माणो / गाहा४३२गघ

पुसइ खणं धुअइ खणं पप्फोडइ तक्खणं अआणंती / गाहा४३३कख
मुद्धवहू थणवट्टे दिण्णं दइएण णक्खवअं / गाहा४३३गघ

वासारत्ते उण्णअपओहरे जोव्वणे व्व वोलीणे / गाहा४३४कख
पढमेक्ककासकुसुमं दीसइ पलिअं व धरणीए / गाहा४३४गघ

कत्थ गअं रइविंवं कत्थ पणट्ठाउ चंदताराउ / गाहा४३५कख
गअणे वलाअवंतिं कालो होरं व कट्ठेइ / गाहा४३५गघ

अविरलपडंतणवजलधारारज्जुघडिअं पअत्तेण / गाहा४३६कख
अपहुत्तो उक्खिविउं रसइ व मेहो महिं उअह / गाहा४३६गघ

ओ हिअअ ओहिदिअहं तइआ पडिवज्जिऊण दइअस्स / गाहा४३७कख
अत्थक्काउल वीसंभघाइ किं तइ समाढत्तं / गाहा४३७गघ

जो वि ण आणइ तस्स वि कहेइ भग्गाइ तेण वलआइं / गाहा४३८कख
अइउज्जुआ वराई अहव पिओ से हआसाए / गाहा४३८गघ

सामाइ गरुअजोव्वणविसेसभरिए कवोलमूलम्मि / गाहा४३९कख
पिज्जइ अहोमुहेण व कण्णवअंसेण लावण्णं / गाहा४३९गघ

सेउल्लिअसव्वंगी गोत्तग्गहणेण तस्स सुहअस्स / गाहा४४०कख
दूइं अप्पाहेंती तस्सेअ घरंगणं पत्ता / गाहा४४०गघ

जम्मंतरे वि चलणे जीएणं मअण तुज्झ अच्चिस्सं / गाहा४४१कख
जइ तं पि तेण वाणेण विज्झसे जेण हं विद्धा / गाहा४४१गघ

णिअवक्खारोविअदेहभारणिउणं रसं लहंतेण / गाहा४४२कख
विअसाविऊण पिज्जइ मालइकलिआ महुअरेण / गाहा४४२गघ

कुरुणाहो विअ पहिओ दुम्मिज्जइ माहवस्स मिलिएण / गाहा४४३कख
भीमेण जहिच्छाए दाहिणवाएण छिप्पंतो / गाहा४४३गघ

जाव ण कोसविआसं पावइ ईसीसि मालईकलिआ / गाहा४४४कख
मअरंदपाणलोहिल्ल भमर ताव च्चिअ मलेसि / गाहा४४४गघ

अकअण्णुअ तुज्झ कए पाउसराईसु जं मए खुण्णं / गाहा४४५कख
उप्पेक्खामि अलज्जिर अज्ज वि तं गामचिक्खिल्लं / गाहा४४५गघ

रेहइ गलंतकेसक्खलंतकुंडलललंतहारलआ / गाहा४४६कख
अद्धुप्पइआ विज्जाहरि व्व पुरिसाइरी वाला / गाहा४४६गघ

जइ भमसि भमसु एमेअ कण्ह सोहग्गगव्विरो गोट्ठे / गाहा४४७कख
महिलाणं दोसगुणे विआरिउं जइ खमो सि तुमं / गाहा४४७गघ

संझासमए जलपूरिअंजलिं विहडिएक्कवामअरं / गाहा४४८कख
गोरीअ कोसपाणुज्जअं व पमहाहिवं णमह / गाहा४४८गघ

गामणिणो सव्वासु वि पिआसु अणुमरणगहिअवेसासु / गाहा४४९कख
मम्मच्छेएसु वि वल्लहाइ उवरिं वलइ दिट्ठी / गाहा४४९गघ

मामि सरिसक्खराण वि अत्थि विसेसो पअंपिअव्वाणं / गाहा४५०कख
णेहमइआणम् अण्णो अण्णो उवरोहमइआणं / गाहा४५०गघ

हिअआहिंतो पसरंति जाइ अण्णाइ ताइ वअणाइ / गाहा४५१कख
ओसरसु किं इमेहिं अहरंतरमेत्तभणिएहिं / गाहा४५१गघ

कह सा सोहग्गगुणं मए समं वहइ णिग्घिण तुमम्मि / गाहा४५२कख
जीअ हरिज्जइ णामं हरिऊण अ दिज्जए मज्झ / गाहा४५२गघ

सहि साहसु सब्भावेण पुच्छिमो किं असेसमहिलाणं / गाहा४५३कख
वड्ढंति करत्थ च्चिअ वलआ दइए पउत्थम्मि / गाहा४५३गघ

भमइ परिदो विसूरइ उक्खिविउं से करं पसारेइ / गाहा४५४कख
करिणो पंकक्खुत्तस्स णेहणिअलाविआ करिणी / गाहा४५४गघ

रइकेलिहिअणिअंसणकरकिसलअरुद्धणअणजुअलस्स / गाहा४५५कख
रुद्दस्स तइअणअणं पव्वइपरिउंविअं जअइ / गाहा४५५गघ

धावइ पुरओ पासेसु भमइ दिट्ठीपहम्मि संठाइ / गाहा४५६कख
णवलइकरस्स तुह हलिअउत्त दे पहरसु वराइं / गाहा४५६गघ

कारिमम् आणंदवडं भामिज्जंतं वहूअ सहिआहिं / गाहा४५७कख
पेच्छइ कुमारिजारो हासुम्मीसेहि अच्छीहिं / गाहा४५७गघ

सणिअं सणिअं ललिअंगुलीअ मअणवडलाअणणिहेण / गाहा४५८कख
वंधइ धवलव्वणवट्टअं व वणिआहरे तरुणी / गाहा४५८गघ

रइविरमलज्जिआओ अप्पत्तणिअंसणाउ सहस त्ति / गाहा४५९कख
ढक्कंति पिअअमालिंगणेण जहणं कुलवहूओ / गाहा४५९गघ

पाअडिअं सोहग्गं तंवाए उअह गोट्ठमज्झम्मि / गाहा४६०कख
दुट्ठवुसहस्स सिंगे अच्छिउडं कंडुअंतीए / गाहा४६०गघ

उअ संभमविक्खित्तं रमिअव्वअलंपडाइ असईए / गाहा४६१कख
णवरंगअं कुडंगे धअं व दिण्णं अविणअस्स / गाहा४६१गघ

हत्थप्फंसेण जरग्गवी वि पण्हअइ दोहअगुणेण / गाहा४६२कख
अवलोइअपण्हुइरिं पुत्तअ पुण्णेहि पाविहिसि / गाहा४६२गघ

मसिणं चंकम्मंती पए पए कुणइ कीस मुहभंगं / गाहा४६३कख
णूणं से मेहलिआ जहणगअं छिवइ णहवंतिं / गाहा४६३गघ

संवाहणसुहरसतोसिएण देंतेण तुह करे लक्खं / गाहा४६४कख
चलणेण विक्कमाइच्चचरिअम् अनुसिक्खिअं तिस्सा / गाहा४६४गघ

पाअपडणाण मुद्धे रहसवलामोडिचुंविअव्वाणं / गाहा४६५कख
दंसणमेत्तपसण्णे चुक्का सि सुहाण वहुआणं / गाहा४६५गघ

दे सुअणु पसिअ एण्हिं पुणो वि सुलहाइ रूसिअव्वाइं / गाहा४६६कख
एसा मअच्छि मअलंछणुज्जला गलइ छणराई / गाहा४६६गघ

आवण्णाइ कुलाइं दो च्चिअ जाणंति उण्णइं णेउं / गाहा४६७कख
गोरीअ हिअअदइओ अहवा सालाहणणरिंदो / गाहा४६७गघ

णिक्खंधदुरारोहं पुत्तअ मा पाडलिं समारुहसु / गाहा४६८कख
आरूढणिवडिआ के इमीअ ण कआ हआसाए / गाहा४६८गघ

गामणिघरम्मि अत्ता एक्क च्चिअ पाडला इहग्गामे / गाहा४६९कख
वहुपाडलं च सीसं दिअरस्स ण सुंदरं एअं / गाहा४६९गघ

अण्णाण वि होंति मुहे पम्हलधवलाइ दीहकसणाइ / गाहा४७०कख
णअणाइ सुंदरीणं तह वि हु दट्ठुं ण आणंति / गाहा४७०गघ

हंसेहि व तुह रणजलअसमअभअचलिअविहलवक्खेहिं / गाहा४७१कख
परिसेसिअपोम्मासेहि माणसं गम्मइ रिऊहिं / गाहा४७१गघ

दुग्गअघरम्मि घरिणी रक्खंती आउलत्तणं पइणो / गाहा४७२कख
पुच्छिअदोहलसद्धा पुणो वि उअअं चिअ कहेइ / गाहा४७२गघ

आअंवलोअणाणं ओल्लंसुअपाअडोरुजहणाणं / गाहा४७३कख
अवरण्हमज्जिरीणं कएण कामो वहइ चावं / गाहा४७३गघ

के उव्वरिआ के इह ण खंडिआ के ण लुत्तगुरुविहवा / गाहा४७४कख
णहराइ वेसिणीओ गणणारेहाउ व वहंति / गाहा४७४गघ

विरहेण मंदरेण व हिअअं दुद्धोअहिं व महिऊण / गाहा४७५कख
उम्मूलिआइ अव्वो अम्हं रअणाइ व सुहाइं / गाहा४७५गघ

उज्जुअरए ण तूसइ वंकम्मि वि आअमं विअप्पेइ / गाहा४७६कख
एत्थ अहव्वाइ मए पिए पिअं कह णु काअव्वं / गाहा४७६गघ

वहुविहविलासरसिए सुरए महिलाण को उवज्झाओ / गाहा४७७कख
सिक्खइ असिक्खिआइ वि सव्वो णेहाणुवंधेण / गाहा४७७गघ

वण्णवसिए विअत्थसि सच्चं चिअ सो तुए ण संभविओ / गाहा४७८कख
ण हु होंति तम्मि दिट्ठे सुत्थावत्थाइ अंगाइं / गाहा४७८गघ

आसण्णविवाहदिणे अहिणववहुसंगमुस्सुअमणस्स / गाहा४७९कख
पढमघरिणीअ सुरअं वरस्स हिअए ण संठाइ / गाहा४७९गघ

जइ लोअणिंदिअं जइ अमंगलं जइ वि मुक्कमज्जाअं / गाहा४८०कख
पुप्फवइदंसणं तह वि देइ हिअअस्स णिव्वाणं / गाहा४८०गघ

जइ ण छिवसि पुप्फवइं पुरओ ता कीस वारिओ ठासि / गाहा४८१कख
छित्तो सि चुलचुलंतेहि धाविऊण ăम्ह हत्थेहि / गाहा४८१गघ

उज्जागरअकसाइअगरुअच्छी मोहमंडणविलक्खा / गाहा४८२कख
लज्जइ लज्जालुइणी सा सुहअ सहीण वि वराई / गाहा४८२गघ

ण वि तह अइगरुएण वि तम्मइ हिअए भरेण गब्भस्स / गाहा४८३कख
जह विवरीअणिहुअणं पिअम्मि सोण्हा अपावंती / गाहा४८३गघ

अगणिअजणाववाअं अवहत्थिअगुरुअणं वराईए / गाहा४८४कख
तुह गलिअदंसणासाइ तीअ वलिउं चिरं रुण्णं / गाहा४८४गघ

हिअअं हिअए णिहिअं चित्तालिहिअ व्व तुह मुहे दिट्ठी / गाहा४८५कख
आलिंगणरहिआइं णवरं झिज्जंति अंगाइं / गाहा४८५गघ

अहअं विओअतणुई दुसहो विरहाणलो चलं जीअं / गाहा४८६कख
अप्पाहिज्जउ किं सहि जाणसि तं चेअ जं जुत्तं / गाहा४८६गघ

तुह विरहुज्जागरओ सिविणे वि ण देइ दंसणसुहाइ / गाहा४८७कख
वाहेण पहालोअणविणोअणं से हअं तं पि / गाहा४८७गघ

अण्णावराहकुविओ जह तह कालेण गच्छइ पसाअं / गाहा४८८कख
वेसत्तणावराहे कुविअं कह तं पसाएमि / गाहा४८८गघ

दीससि पिआइ जंपसि सब्भावो सुहअ एत्तिओ च्चेअ / गाहा४८९कख
फालेइऊण हिअअं साहसु को दावए कस्स / गाहा४८९गघ

उअअं लहिउं उत्ताणिआणणा होंति के वि सविसेसं / गाहा४९०कख
रित्ता णमंति सुइरं रहट्टघडिअ व्व कापुरिसा / गाहा४९०गघ

भग्गपिअसंगमं केत्तिअं व जोण्हाजलं णहसरम्मि / गाहा४९१कख
चंदअरपणालणिझरणिवहपडंतं ण णिट्ठाइ / गाहा४९१गघ

सुंदरजुआणजणसंकुले वि तुह दंसणं विमग्गंती / गाहा४९२कख
रण्णे व भमइ दिट्ठी वराइआए समुव्विग्गा / गाहा४९२गघ

अइकोवणा वि सासू रुआविआ गअवईअ सोण्हाए / गाहा४९३कख
पाअपडनोणआए दोसु वि गलिएसु वलएसु / गाहा४९३गघ

रोवंति व्व अरण्णे दूसहरइकिरिणफंससंतत्ता / गाहा४९४कख
अइतारझिल्लिविरुएहि पाअवा गिम्हमज्झण्हे / गाहा४९४गघ

पढमणिलीणमहुरमहुलोहिल्लालिउलवद्धझंकारं / गाहा४९५कख
अहिमअरकिरणणिउरुंवचुंविअं दलइ कमलवणं / गाहा४९५गघ

गोत्तक्खलणं सोऊण पिअअमे अज्ज तीअ छणदिअहे / गाहा४९६कख
वज्झमहिसस्स माल व्व मंडणं उअह पडिहाइ / गाहा४९६गघ

महमहइ मलअवाओ अत्ता वारेइ मं घरा णिंतिं / गाहा४९७कख
अंकोल्लपरिमलेण वि जो क्खु मुओ सो मुओ च्चेअ / गाहा४९७गघ

मुहपेच्छओ पई से सा वि हु सविसेसदंसणुम्मइआ / गाहा४९८कख
दो वि कअत्था पुहइं अमहिलपुरिसं व मण्णंति / गाहा४९८गघ

खेमं कत्तो खेमं जो सो खुज्जंवओ घरद्दारे / गाहा४९९कख
तस्स किर मत्थआओ को वि अणत्थो समुप्पण्णो / गाहा४९९गघ

रसिअजणहिअअदइए कइवच्छलपमुहसुकइणिम्मइए / गाहा५००कख
सत्तसअम्मि समत्तं पंचमगाहासअं एअं / गाहा५००गघ