गाहासत्तसई दशमशतकम्

विकिस्रोतः तः

गाहासत्तसई


जइआ पिओ ण दीसइ भणह हला कस्स कीरए माणो / गाहा९०१कख
अह दिट्ठम्मि वि माणो ता तस्स पिअत्तणं कत्तो / गाहा९०१गघ

जाणिमि कआवराहं जाणिमि अलिआइ भणइ सअलाइ / गाहा९०२कख
अणुणेंते उण जाणे कआवराहं व अप्पाणं / गाहा९०२गघ

अवराहसहस्साइं भरिमो हिअएण तम्मि अद्दिट्ठे / गाहा९०३कख
दिट्ठम्मि उण पिअसही एक्कं पि हु णं ण संभरिमो / गाहा९०३गघ

भणभण जंजं पडिहाइ तुज्झ तंतं सहामिमो अम्हे / गाहा९०४कख
असहत्तणं च जीअं च वल्लभे दोइ ण घडंति / गाहा९०४गघ

एअं चिअ मह णामं भणभण दे सुहअ किं विलक्खो सि / गाहा९०५कख
पडिहाइ जं ण तुज्झ वि ममं पि किं देण णामेण / गाहा९०५गघ

सुहअ मुहुत्तं सुप्पउ जं ते पडिहाइ तं पि भण्णिहिसि / गाहा९०६कख
अज्ज ण पेच्छंति तुहं णिद्दागरुआइ अच्छीइ / गाहा९०६गघ

मा वेलवेसु बहुअं पुत्तअ अलिएहि गोत्तेहिं / गाहा९०७कख
एसा वि जाणइ च्चिअ परिहासुम्मिस्सभणिआइं / गाहा९०७गघ

अइ चंडि किं ण पेच्छसि जइ सो वाहरइ अण्णगोत्तेण / गाहा९०८कख
अह दे इच्छइ मच्छरपणच्चिअच्छं मुहं दट्ठुं / गाहा९०८गघ

वेआरिज्जसि मुद्धे गोत्तक्खलिएहि मा खु तुं रुवसु / गाहा९०९कख
किं व ण पेच्छइ अण्णह एद्दहमेत्तेहि अच्छीहिं / गाहा९०९गघ

सोत्तुं सुहं ण लब्भइ अव्वो पेम्मस्स वंकविसमस्स / गाहा९१०कख
दुग्घडिअमंचअस्स व खणेखणे पाअपडणेण / गाहा९१०गघ

एक्कसअणम्मि सुमुही विमुही गरुएण माणबंधेण / गाहा९११कख
सिविणकलहम्मि होंती परम्मुही सम्मुही जाआ / गाहा९११गघ

वड्ढउ ता तुह गव्वो भण्णसि रे जइ विहंडणं वअणं / गाहा९१२कख
सच्चं ण एइ णिद्दा तुए विणा देहि ओआसं / गाहा९१२गघ

कअविच्छेओ सहिभंगिभणिअसब्भाविआवराहाए / गाहा९१३कख
झडि आपल्लवइ पुणो णअणकवोलेसु कोवतरू / गाहा९१३गघ

उम्मूलंति व हिअअं अणुणिज्जंतीŏ माणवंतीओ / गाहा९१४कख
संभरिअमण्णुणिब्भरबाहभरोरुंभिअमुहीओ / गाहा९१४गघ

ण वि तह तक्खणसुअमण्णुदुक्खविअणाŏ वि रुवंति / गाहा९१५कख
जह दिट्ठम्मि पिअअमे अणुणिज्जंतीŏ तरुणीŏ / गाहा९१५गघ

हिअए रोसुक्खित्तं पाअपहारं सिरेण पत्थंतो / गाहा९१६कख
ण हओ दइओ माणंसिणीĕ थोरंसुअं रुण्णं / गाहा९१६गघ

पिअअमविइण्णचसअं अचक्खिअं पिअसहीĕ देंतीए / गाहा९१७कख
अभणंतीĕ वि माणंसिणीĕ कहिओ च्चिअ विरोहो / गाहा९१७गघ

वच्चिहिइ स घरं से लहिहिइ ओआसम् एहिइ सआसं / गाहा९१८कख
भणिहिइ जं भणिअव्वं पच्चुत्तं किंणु पाविहिइ / गाहा९१८गघ

तणुआइआ वराई दिअहेदिअहे मिअंकलेह व्व / गाहा९१९कख
बहलपओसेण तुए णिसंस अंधारिअमुहेण / गाहा९१९गघ

दावंतेण तुह मुहं भुमआभंगम्मि होंतणवसोहं / गाहा९२०कख
अकएण उवकअं अज्ज मण्णुणा मज्झ पसिअच्छि / गाहा९२०गघ

भिउडी ण कआ कडुअं णा ऽलविअं अहरअं ण पज्जुट्ठं / गाहा९२१कख
उवऊहिआ ण रुण्णा एएण वि जाणिमो माणं / गाहा९२१गघ

किं पि ण जंपसि कामं भणिअं च करेसि तं तहा तुरिअं / गाहा९२२कख
हिअअं रोसुव्वेअं ति तुज्झ विणओ च्चिअ कहेइ / गाहा९२२गघ

परिपुच्छिआ ण जंपसि चुंबिज्जंती बला मुहं हरसि / गाहा९२३कख
परिहासमाणविमुहे पसिअच्छि मणं म्ह दूमेसि / गाहा९२३गघ

अइ पीणत्थणउत्थंभिआणणे सुअणु सुणसु मह वअणं / गाहा९२४कख
अथिरम्मि जुज्जइ ण जोव्वणम्मि माणो पिए कादुं / गाहा९२४गघ

तरलच्छि चंदवअणे थोरत्थणि करिअरोरु तणुमज्झे / गाहा९२५कख
दीहा ण समप्पइ सिसिरजामिणी कह णु दे माणो / गाहा९२५गघ

सुहआ वि सुंडरी वि हु तरुणी वि हु माणिणि त्ति आ पुत्ति / गाहा९२६कख
चंदणलट्ठि व्व हुअंगदूमिआ किं डु दूमेसि / गाहा९२६गघ

पडिवक्खस्स वि पुरओ समुहं भणिआ सि तेण पसिअ त्ति / गाहा९२७कख
अवलंबिअस्स माणिणि माणस्स अ किं फलं अण्णं / गाहा९२७गघ

कड्ढेसि चलिअवलए हत्थे मुंचेसि अहमुही बाहं / गाहा९२८कख
पडिरुंभसि णीसासे बहुअं ते माणविण्णाणं / गाहा९२८गघ

कज्जं विणा वि कअमाणडंबरा पुलअभिण्णसव्वंगी / गाहा९२९कख
उज्जल्लालिंगणसोक्खलालसा पुत्ति मुणिआ सि / गाहा९२९गघ

हंहो किं व ण दिट्ठं हला मए जीविअं धरंतीए / गाहा९३०कख
सो मं अणुणेइ पिओ अहं पि अणुणिज्जिमि हआसा / गाहा९३०गघ

ता सोक्खं ताव रई ता रणरणअस्स ण त्थि ओआसो / गाहा९३१कख
जा दुक्खेक्कणिहाणे ण होइ बहुवल्लहे पेम्मं / गाहा९३१गघ

माणहरिएहि गंतुं ण तीरए सो णएइ अवराही / गाहा९३२कख
को वि अपत्थिअमुणिओ णेज्जं मंतं व आणेज्ज / गाहा९३२गघ

उव्वहइ दइअगहिआ हरोट्ठझिज्जंतकोवगअराअं / गाहा९३३कख
पाणोसरंतमइरं व फलिहचसअं मुहं बाला / गाहा९३३गघ

गाढालिंगणरभसुज्जअम्मि दइए लहुं समोसरइ / गाहा९३४कख
माणंसिणीĕ माणो फेल्लणभीओ व्व हिअआहि / गाहा९३४गघ

तुंगो थिरो विसालो जो सहि मे माणपव्वओ रइओ / गाहा९३५कख
सो दइअदिट्ठिवज्जासणीĕ घाए विण पहुंतो / गाहा९३५गघ

सहि विरइऊण माणस्स मज्झ धीरत्तणेण ओआसं / गाहा९३६कख
पिअअमदंसणविहलक्खणम्मि सहसे ऽत्ति तेण ओसरिअं / गाहा९३६गघ

णहपअपसाहिअंगो णिद्दाघुम्मंतलोअणो ण तहा / गाहा९३७कख
जह णिव्वणाहरो सामलंग दूमेसि मह हिअअं / गाहा९३७गघ

पच्चक्खमंतुकारअ जइ चुंबसि मे इमे हअकवोले / गाहा९३८कख
ता मज्झ पिअसहीए विसेसओ कीस तण्हाओ / गाहा९३८गघ

तइआ मह गंडत्थलणिमिअं दिट्ठिं ण णेसि अण्णत्तो / गाहा९३९कख
एण्हिं स च्चेअ अहं ते अ कवोला ण सा दिट्ठी / गाहा९३९गघ

ताण गुणग्गहणाणं ताण्ऽ उक्कंठाण तस्स पेम्मस्स / गाहा९४०कख
ताण भणिआण सुंदर ईरिसअं जाअम् अवसाणं / गाहा९४०गघ

अलिअकुविअं पि कअमंतुअं व मं जेसु सुहअ अणुणेंतो / गाहा९४१कख
ताण दिअहाण हरणे रुआमि ण उणो अहं कुविआ / गाहा९४१गघ

आम तुह णा ऽवराहो पिअअम मे लोअणाण इह दोसो / गाहा९४२कख
माणासहम्मि चडुलेहि वासिओ जेहि हिअअम्मि / गाहा९४२गघ

को सुहअ तुज्झ दोसो हअहिअअं णिट्ठुरं मज्झ / गाहा९४३कख
पेच्छसि अणिमिसणअणो जंपसि विणअं ण जंपसे पिट्ठं / गाहा९४३गघ

वच्च मह च्चिअ एक्काĕ होंतु णीसासरोइअव्वाइ / गाहा९४४कख
मा तुज्झ वि तीĕ विणा दक्खिण्णहअस्स जाणीअंतु / गाहा९४४गघ

अणुवत्तंतो अम्हारिसं जणं आहिजाईए / गाहा९४५कख
चिंतेसि उणो हिअए अणाहिजाई सुहं जअइ / गाहा९४५गघ

हुं णिल्लज्ज समोसर तं चिअ अणुणेसु जीĕ दे एअं / गाहा९४६कख
पाअंगु̣ट्ठालत्तअरसेण तिलअं विणिम्मविअं / गाहा९४६गघ

सा वसइ तुज्झ हिअए स च्चिअ अच्छीसु सा अ सिविणेसु / गाहा९४७कख
अम्हारिसाण सुंदर ओआसो कत्थ पावाण / गाहा९४७गघ

तण्हा मे तुज्झ पिअत्तणस्स कह तं ति णो हि जाणामो / गाहा९४८कख
दे सुहअ तुमं चिअ सिक्खवेसु जह दे पिआ होमि / गाहा९४८गघ

मलिणवसणाण किअवणिआणं आपंडुगंडपालीणं / गाहा९४९कख
पुप्फवइआण कामो अंगेसु कआउहो वसइ / गाहा९४९गघ

पुप्फवइअ म्हि बालअ मा चिवसु अदीहराउसो होसि / गाहा९५०कख
अज्जं चेअ मरिज्जउ मअच्छि किं कालहरणेण / गाहा९५०गघ

वाणिअअ हत्थिदंता कत्तो अम्हाण वग्घकत्तीओ / गाहा९५१कख
जाव लुलिआलअमुही घरम्मि परिसक्कए सोण्हा / गाहा९५१गघ

गण्हंति पिअअमाण वअणाहि हंसीŏ विसलअद्धाइ / गाहा९५२कख
हिअआइ व कुसुमाउहबाणकआणेअरंधाइ / गाहा९५२गघ

हंसाण सरेहि सिरी सारिज्जइ अह सराण हंसेहि / गाहा९५३कख
अण्णोण्णं चिअ एए अप्पाणं णवर गरुअंति / गाहा९५३गघ

अणुदिअहकआभोआ जहजह थणआ विणिंति कुमरीए / गाहा९५४कख
तहतह लद्धोआसो व्व वम्महो हिअअम् आविसइ / गाहा९५४गघ

केसा पंडुरछाआ असईसंगेण चम्म जज्जरिअं / गाहा९५५कख
चित्तं तुह सोहग्गं गोदा दूइत्तणं कुणइ / गाहा९५५गघ

णिण्णिद्दं दोब्बल्लं चिंता अलसत्तणं सणीससिअं / गाहा९५६कख
मह मंदभाइणीए कए सहि तुमं वि अहह परिभवइ / गाहा९५६गघ

णिअदइअदंसणूसुअ पंथिअ अण्णेण वच्चसु पहेण / गाहा९५७कख
घरवइधूआ दुल्लं घवाउरा ठाइ हअगामे / गाहा९५७गघ

आसाइअं अण्णाएण जेत्तिअं ता तुइ ण बहुआ धिई / गाहा९५८कख
उवरमसु वुसह एण्हिं रक्खिज्जइ गेहवइखेत्तं / गाहा९५८गघ

उच्चिणसु पडिअकुसुमं मा धुण सेहालिअं हलिअसुण्हे / गाहा९५९कख
एस अवसाणविरसो ससुरेण सुओ वलअसद्दो / गाहा९५९गघ

पविसंती घरदारं विवलिअवअणा विलोइऊण पहं / गाहा९६०कख
खंधे मोत्तूण घडं हाहा णट्ठो त्ति रुअसि सहि किं ति / गाहा९६०गघ

मा पंथ रुंधसु पहम् अबेहि बालअ असेसिअहिरीअ / गाहा९६१कख
अम्हे अणिरिक्काओ सुण्णं घरअं व अक्कमसि / गाहा९६१गघ

सुव्वइ समागमिस्सइ तुज्झ पिओ अज्ज पहरमेत्तेण / गाहा९६२कख
एमेअ किं पि चिट्ठसि ता सहि सज्जेसु करणिज्जं / गाहा९६२गघ

खणपाहुणिआ देअरजाया ए सुहय किं ते दे हणिदा / गाहा९६३कख
रुअइ घरोपंतफलिणिघरम्मि अणुणिज्जउ वराई / गाहा९६३गघ

पुप्फभरोणमिअभूमिगअसाहतरूण विण्णवणं / गाहा९६४कख
गोलाअडविअडकुडुंगमहुअ... / गाहा९६४गघ

गृहिणिप्रवेशितजारे गृहे गृहे (गृहिणी) स्थापिता / गाहा९६५कख
मिलितावदति(असती?)जारौ पश्चाद् गृहिणी गृहस्थश् च / गाहा९६५गघ

एक्कत्तो रुअइ पिआ अण्णत्तो समरतूरणिग्घोसो / गाहा९६६कख
पेम्मेण रणरसेण अ भडस्स डोलाइअं हिअअं / गाहा९६६गघ

केलीगोत्तक्खलणे विकुप्पए केअवं अआणंती / गाहा९६७कख
दुट्ठ उअसु परिहासं जाआ सच्चं चिअ परुण्णा / गाहा९६७गघ

दे आ पसिअ णिअत्तसु मुहससिजोण्हाविलुत्ततमणिवहे / गाहा९६८कख
अहिसारिआण विग्घं करेसि अण्णाण वि हआसे / गाहा९६८गघ

अण्णं लहुअत्तणअं अण्ण च्चिअ काइ वत्तणच्छाआ / गाहा९६९कख
सामा सामण्णपआवइणो रेह च्चिअ ण होइ / गाहा९६९गघ

अलससिरोमणि धुत्ताण अग्गिमो पुत्ति धणसमिद्धिमओ / गाहा९७०कख
इअ भणिएण णअंगी पप्फुल्लविलोअणा जाआ / गाहा९७०गघ

उल्लोल्लकरअरअणक्खएहि तुह लोअणेसु मह दिण्णं / गाहा९७१कख
रत्तंसुअं पसाओ कोवेण पुणो इमे ण अक्कमिआ / गाहा९७१गघ

ए एहि दाव सुंदरि कण्णं दाऊण सुणसु वअणिज्जं / गाहा९७२कख
तुज्झ मुहेण किसोअरि चंदो उअमिज्जइ जणेण / गाहा९७२गघ

एद्दहमेत्तत्थणिआ एद्दहमेत्तेहि अच्छिवत्तेहिं / गाहा९७३कख
एद्दहमेत्तावत्था एद्दहमेत्तेहि दिअहेहिं / गाहा९७३गघ

करजुअगहिअजसोआथणमुहविणिवेसिआहरपुडस्स / गाहा९७४कख
संभरिअपंचजण्णस्स णमह कण्हस्स रोमंचं / गाहा९७४गघ

का विसमा देव्वगई किं दुल्लब्भं जणो गुणग्गाही / गाहा९७५कख
किं सोक्खं सुकलत्तं किं दुक्खं जं खलो लोओ / गाहा९७५गघ

किवणाण धणं णाआण फणमणी केसराइ सीहाणं / गाहा९७६कख
कुलवालिआण अ थणा कत्तो झिय्यंति अमुआणं / गाहा९७६गघ

केसेसु वलामोडिअ तेण समरम्मि जअस्सिरी गहिआ / गाहा९७७कख
जह कंदराहि विहुरा तस्स दढं कंठअम्मि संठविआ / गाहा९७७गघ

खलववहारा दीसंति दारुणा जह वि तह वि धीराणं / गाहा९७८कख
हिअअवअस्सवहुमआ ण हु ववसाआ विमुज्झंति / गाहा९७८गघ

जं परिहरिउं तीरइ मणं पि ण सुंदरअत्तणगुणेण / गाहा९७९कख
अह णवरम् अस्स दोसो पडिवच्छेहिं पि पडिवण्णो / गाहा९७९गघ

जस्स रणंतेउरए करे कुणंतस्स मंडलग्गलअं / गाहा९८०कख
रससम्मुही वि सहसा परम्मुही होइ रिउसेणा / गाहा९८०गघ

जस्सेअ वणो तस्सेअ वेअणा भणइ तं जणो अलिअं / गाहा९८१कख
दंतक्खअं कवोले वहूĕ विअणा सवत्तीणं / गाहा९८१गघ

जहा गहिरो जहा रअणणिब्भरो जह अ णिम्मलच्छाओ / गाहा९८२कख
तह किं विहिणा एसो सबाणिओ जलणिही ण किओ / गाहा९८२गघ

जा ठेरं व हसंती कइवअणंवुरुहवद्धविणिवेसा / गाहा९८३कख
दावेइ भुअणमंडलम् अण्णं विअ (चिअ?) जअइ सा वाणी / गाहा९८३गघ

जोण्हाइ महुरसेण अ विइण्णतारुण्णउच्छुअमणा सा / गाहा९८४कख
वुड्ढा वि णवोढ व्व परवहू अह हरइ तुह हिअअं / गाहा९८४गघ

टुंटुण्णंतो मरिहिसि कंटअकलिआइ केअइवणाइं / गाहा९८५कख
मालइकुसुमसरिच्छं भमर भमंतो ण पाविहिसि / गाहा९८५गघ

णवपुण्णिमामिअंकस्स सुहअ को तं सि भणसु मह सच्चं / गाहा९८६कख
का सोहग्गसमग्गा पओसरअणि व्व तुह अज्ज / गाहा९८६गघ

णिहुअरमणम्मि लोअणपहम्मि पडिए गुरुअणमज्झम्मि / गाहा९८७कख
सअलपरिहारहिअआ वणगमणं चेअ महइ वहू / गाहा९८७गघ

तं ताण सिरिसहोअररअणाहरणम्मि हिअअम् एक्करसं / गाहा९८८कख
विंवाहरे पिआणं णिवेसिअं कुसुमवाणेण / गाहा९८८गघ

ताला जाअंति गुणा जाला दे सहिअएहि घेप्पंति / गाहा९८९कख
रइकिरणाणुगहिआइ होंति कमलाइ अ कमलाइं / गाहा९८९गघ

तुह वल्लहस्स गोसम्मि आसि अहरो मिलाणकमलदलो / गाहा९९०कख
इअ णववहुआ सोऊण कुणइ वअणं महीसमुहं / गाहा९९०गघ

मह देसु रसं धम्मे तमवसम् आसं गमागमा हर णे / गाहा९९१कख
हरवहु सरणं तं चित्तमोहम् अवसरउ मे सहसा / गाहा९९१गघ

राईसु चंदधवलासु ललिअम् आफालिऊण जो चावं / गाहा९९२कख
एक्कच्छत्तं च्चिअ कुणइ भुअणरज्जं विअंभंतो / गाहा९९२गघ

लहिऊण तुज्झ वाहुप्फंसं जीए स को वि उल्लासो / गाहा९९३कख
जअलच्छी तुह विरहे ण हु ऽज्जला दुव्वलाणं सा / गाहा९९३गघ

वारिज्जंतो वि उणो संदावकअत्थिएण हिअएण / गाहा९९४कख
थणहरवअस्सएणं विसुद्धजाई ण चलइ से हारो / गाहा९९४गघ

सअलकरणपरवीसामसिरिविअरणं ण सरसकव्वस्स / गाहा९९५कख
दीसइ अह व णिसम्मइ सरिसं अंसंसमेत्तेण / गाहा९९५गघ

सहि णवणिहुवणसमरम्मि अंकवालीसहीĕ णिविडाए / गाहा९९६कख
हारो णिवारओ च्चिअ उच्छीरंतो तदा कहं रमिअं / गाहा९९६गघ

सो ण त्थि एत्थ गामो जो एअं महमहंतलाअण्णं / गाहा९९७कख
तरुणाणं हिअअलुडिं परिसक्कंतिं णिवारेइ / गाहा९९७गघ

सो सुद्धसामलंगो धम्मिल्लो कलिअललिअणिअदेहो / गाहा९९८कख
तीए खंधाहि वलं गहिअ सरो सुरअसंगरे जअइ / गाहा९९८गघ

होमि वहत्थिअरेहो णिरंकुसो अह विवेअरहिओ वि / गाहा९९९कख
सिविणे वि तुमम्मि पुणो पत्तिहि भत्तिं ण सुमरामि / गाहा९९९गघ

सज्जेइ सुरहिमासो ण आपणेइ जुअइजणलक्खसहे / गाहा१०००कख
अहिणअसहआरमुहे णअपल्लवपत्तणे अणंगसरे / गाहा१०००गघ

"https://sa.wikisource.org/w/index.php?title=गाहासत्तसई_दशमशतकम्&oldid=35110" इत्यस्माद् प्रतिप्राप्तम्