गाहासत्तसई अष्टमशतकम्

विकिस्रोतः तः

गाहासत्तसई


चोराण कामुआण अ पामरपहिआण कुक्कुरो वडइ / गाहा७०१कख
रे रमह वहह वाहयह एत्थ तणुआअए रअणी / गाहा७०१गघ

अण्णोण्णकलक्खंतरपेसिअमेलीणदिट्ठिपसराइं / गाहा७०२कख
दो च्चिअ मण्णे कअभंडणाइ समअं पहसिआइं / गाहा७०२गघ

सुहअ इअं मज्झ सही तुज्झ विओएण धारिउं पाणे / गाहा७०३कख
सव्वह चिअ ण समत्थ त्ति वुज्झिउं विरम गमणाओ / गाहा७०३गघ

धण्णा वहिरंधरआ ते च्चिअ जीअंति माणुसे लोए / गाहा७०४कख
ण सुणंति पिसुणवअणं खलाण अद्धिं ण पेक्खंति / गाहा७०४गघ

गामारुह म्हि गामे वसामि णअरट्ठिइं ण आणामि / गाहा७०५कख
णाअरिआणं पइणो हरेमि जा होमि सा होमि / गाहा७०५गघ

ओसर रोत्तुं चिअ णिम्मिआइ मा पुससु मे हअच्छीइं / गाहा७०६कख
दंसणमेत्तुम्मइएहि जेहि सीलं तुह ण णाअं / गाहा७०६गघ

रणरणअसुण्णहिअओ चिंतंतो विरहदुव्वलं जाअं / गाहा७०७कख
अमुणिअणिअवसही सो वोलीणो गाममज्झेण / गाहा७०७गघ

एत्थ चउत्थं विरमइ गाहाण सअं सहावरमणिज्जं / गाहा७०८कख
सोऊण जं ण लग्गइ हिअए महुरत्तणेण अमिअं पि / गाहा७०८गघ

एसो कइणामंकिअगाहापडिवद्धवड्ढिआमोओ / गाहा७०९कख
सत्तसअओ समत्तो सालाहणविरइओ कोसो / गाहा७०९गघ

सुअणो णि दीसइ च्चिअ खलबहुल डड्ढजीअलोअम्मि / गाहा७१०कख
जह काअसंकुला तह ण हंसपरिवारिआ पुहवी / गाहा७१०गघ

जं मुच्छिआइ ण सुओ कलंवगंधेण तं गुण पडिअं / गाहा७११कख
इअरा गज्जिअसद्दो जीएण विणा ण वोलंतो / गाहा७११गघ

पीणपओहरलग्गं दिसाण पवसंतजलअसमअविइण्णं / गाहा७१२कख
सोहग्गपढमइण्हं पच्चाअइ सरणहपहं इंदधणुं / गाहा७१२गघ

एत्ती मत्तम्मि थवा पुत्तीमत्तम्मि लअणा भत्ती / गाहा७१३कख
अगईअ अवत्थाए दिअहाइं भित्तरं तरइ / गाहा७१३गघ

जं असरणो व्व डड्ढो गामो साहीणवहुजुआणो वि / गाहा७१४कख
संभमविसंठुलाणं तं दुच्चरिअं तुह थणाणं / गाहा७१४गघ

सो वि जुआ माणहणो तुमं पि माणस्स असहणा पुत्ति / गाहा७१५कख
मत्तच्छलेण गम्मउ सुराइ उवरिं पुससु हत्थं / गाहा७१५गघ

केअइगंधहगव्विआरअरंजिआद्दणेहिं / गाहा७१६कख
कंठअसवलितणुतव छड्डिअभवलाणं / गाहा७१६गघ

अह सुअइ दिण्णपडिवक्खवेअणा पसिढिलेहि अंगेहिं / गाहा७१७कख
णिव्वत्तिअसुरअरसाणुवंधसुहणिब्भरं वहुआ / गाहा७१७गघ

जइ तेण तुज्झ वअणं ण कअं मह कारणेण अ हआसे / गाहा७१८कख
सा कीस खंडिअतडं णिआहरं दूइ दुम्मेसि / गाहा७१८गघ

निर्मलगगनतडागे तारागणकुसुमभितेतिमिरे / गाहा७१९कख
भिकरवोबालं चरति मृगांको मराल इव / गाहा७१९गघ

दिट्ठाइ जं ण दिट्ठो सरलसहावाइ जं च णा ऽलविओ / गाहा७२०कख
उवआरो जं ण कओ तं चिअ कलिअं छइल्लेहिं / गाहा७२०गघ

अविरलणिग्गअपुलओ पअडिअकंपो पमुक्कसिक्कारो / गाहा७२१कख
हेमंते पहिअजणो सुरआसत्तो व्व पडिहाइ / गाहा७२१गघ

वहुविहविलासभरिए सुरए लब्भंति जाइ सोक्खाइं / गाहा७२२कख
विरहम्मि ताइ पिअसहि खाउग्गिण्णाइ कीरंति / गाहा७२२गघ

सेउल्लणिअंवालग्गसण्हसिचअस्स मग्गम् अलहंतो / गाहा७२३कख
सहि मोहघोलिरो अज्ज तस्स हसिओ मए हत्थो / गाहा७२३गघ

दूईकज्जाअण्णणपडिरोहं मा करेहिइ इमं ति / गाहा७२४कख
उत्थंघेइ व तुरिअं तिस्सा कण्णुप्पलं पुलओ / गाहा७२४गघ

मा वच्चसु वीसंभं पुत्तअ चडुआरओ इमो लोओ / गाहा७२५कख
सूईवेहो कण्णस्स पेच्छ किं णिज्जइ पमाणं / गाहा७२५गघ

अमिअमअं चिअ हिअअं हत्था तण्हाहरा सअण्हाणं / गाहा७२६कख
चंदमुहि कत्थ णिवसइ अमित्तदहणो तुह पआवो / गाहा७२६गघ

दिट्ठीअ जाव पसरो ताव तुमं सुहअ णिव्वुइं कुणसि / गाहा७२७कख
वोलीणदंसणो तह तवेसि जह होउदिट्ठेण / गाहा७२७गघ

गज्जंति घणा पंथाणो वहुतणा अ पसारिआ सरिआ / गाहा७२९कख
अज्ज वि उज्जुअसीले पइणो मग्गं पलोएसि / गाहा७२९गघ

उण्हो त्ति समत्थिज्जइ डाहेण सरोरुहाण हेमंतो / गाहा७३०कख
चरिएहि णज्जइ जणो संगोवंतो वि अप्पाणं / गाहा७३०गघ

उवहारिआइ समअं पिंडारे उअ कहं कुणंतम्मि / गाहा७३१कख
णववहुआइ सरोसं सव्व च्चिअ वछआ मुक्का / गाहा७३१गघ

पज्जालिऊण अग्गिं मुहेण पुत्तिअ किणो समोसरसि / गाहा७३२कख
थणअलसपडिअपडिमा फुरंति ण छिवंति ते जाला / गाहा७३२गघ

अग्गिं अब्भुत्तंतीअ पुत्ति पडिमागआ कवोलम्मि / गाहा७३३कख
कण्णालंविअपल्लवलच्छिं संधेइ ते जाला / गाहा७३३गघ

कह दे धूमंधारे अब्भुत्तणं अग्गिणो समप्पिहइ / गाहा७३४कख
मुहकमलचुंवणालेहडम्मि पासट्ठिए दिअरे / गाहा७३४गघ

आअंवच्छं पअलंतवाहम् आवद्धथणहरुक्कंपं / गाहा७३५कख
असमत्तं चिअ चिट्ठउ सिहिणो अब्भुत्तणम् इणं ते / गाहा७३५गघ

छणपाहुणिए ऽत्ति किणो अज्ज वि णं भणह अंगसंतावं / गाहा७३६कख
जाआ अम्ह घरिल्लअगुणेण घरसामिणि च्चेअ / गाहा७३६गघ

वण्णक्कमं ण आणसि ठाणविसुद्धी वि दे ण णिव्वडिआ / गाहा७३७कख
चित्तअर तह वि मग्गसि भोइणिकुड्डम्मि आलिहिउं / गाहा७३७गघ

विअलिअकलाकलावो चंदो मित्तस्स मंडलं विसइ / गाहा७३८कख
णिस्सरइ तादिसो च्चिअ गअविहवं को समुद्धरइ / गाहा७३८गघ

णा ऽहं दूई सुंदर तीए पिओ सि ण अम्ह वावारो / गाहा७३९कख
सा मरइ तुज्झ विरहे एअं धम्मक्खरं भणिमो / गाहा७३९गघ

जो होइ रसाइसओ सुविणट्ठाणं वि पुंडइच्छूणं / गाहा७४०कख
कत्तो सो होइ रसो मोहासाणं अणिच्छूणं / गाहा७४०गघ

जइ वि हु दिल्लिंदिलिआ तह वि हु मा पुत्ति णग्गिआ भमसु / गाहा७४१कख
छेआ णअरजुआणो माअं धूआइ लक्खंति / गाहा७४१गघ

गअगंडअगवअसरभसेरिहसद्दूलरिक्खजाईणं / गाहा७४२कख
थणआ वाहवहूए अभअं दाउं व णिक्कंता / गाहा७४२गघ

भिउडीअ पुलोइस्सं णिब्भच्छिस्सं परंमुही होस्सं / गाहा७४३कख
जं भणह तं करिस्सं सहीउ जइ तं ण पेच्छिस्सं / गाहा७४३गघ

जं केअवेण पेम्मं जं च वला जं च अत्थलोहेण / गाहा७४४कख
जं उवरोहणिमित्तं णमोणमो तस्स पेम्मस्स / गाहा७४४गघ

कस्स ण सद्धा गरुअत्तणम्मि पइणो पसाअमाणस्स / गाहा७४५कख
जइ माणभंजणीओ ण होंति हेमंतराईओ / गाहा७४५गघ

अव्वो तहिंतहिं चिअ गअणे भमिऊण वीसमंतेण / गाहा७४६कख
वोहित्तवाअसेण व्व हासिआ डड्ढपेम्मेण / गाहा७४६गघ

दे आ दुमसु तुमं चिय मा परिहर पुत्ति पढमदुमियं ति / गाहा७४७कख
किं कुड्डं णिअमुहअंदकंतिदुमिअं ण लक्खेसि / गाहा७४७गघ

विज्जंति तणुं उवणेंति वेअणं णेयताण खयमग्गे / गाहा७४८कख
अब्बो अइट्ठपुव्वो अणंगबाणाण माहप्पो / गाहा७४८गघ

आमोडऊण बलाउ हत्थं मज्झं गओ सि भो पहिअ / गाहा७४९कख
हिअआउ जइ अ णीहसि सामत्थं तुज्झ जाणिस्सं / गाहा७४९गघ

सद्धा मे तुज्झ पियत्तणस्स अहयं तु तं ण याणामि / गाहा७५०कख
दे पसिय तुमं चिय सिक्खवेसु जह ते पिया होमि / गाहा७५०गघ

पेम्मुम्मइयाइ मए उवऊढो हलियउत्तबुद्धीए / गाहा७५१कख
फंसेमि जाव फरुसो तणपुरिसो गामसीमाए / गाहा७५१गघ

बे मग्गा धरणियले माणिणि माणोण्णयाण पुरिसाण / गाहा७५२कख
अहवा पावंति सिरिं अहव भमंता समप्पंति / गाहा७५२गघ

कत्तो कमलाण रई कत्तो कुमुयाण सीअलो चंदो / गाहा७५३कख
तह सज्जणाण णेहो ण चलइ दूरट्ठिआणं पि / गाहा७५३गघ

हा हा किं तेण कयं मालइविरहम्मि पुत्ति भसलेणं / गाहा७५४कख
कंकेल्लिकुसुममज्झे जलणो त्ति समप्पिओ अप्पा / गाहा७५४गघ

ढंखरसेसो वि हु महुअरेण मुक्को ण मालईविडवो / गाहा७५५कख
दरवियसियकलियामोयबहलिमं संभरंतेण / गाहा७५५गघ

समुहागयवोलंतम्मि सा तुमे अघडियंगसंठाणा / गाहा७५६कख
रुंदं वि गामरच्छं णिंदइ तणुअं च अप्पाणं / गाहा७५६गघ

समम् अच्छंति णिअत्तंति पसरिया रणरणंति तद्धियहं / गाहा७५७कख
चलचित्त तुज्झ लग्गा मणोरहा तीĕ हिययम्मि / गाहा७५७गघ

डहिऊण सयलरण्णं अग्गी समविसमलंघणुव्वायो / गाहा७५८कख
तडलंबंततणेहिं तिसिय व्व णइं समोसरइ / गाहा७५८गघ

स च्चिय रामेउ तुमं पंडिय णिच्चं अलं म्ह रमिएण / गाहा७५९कख
सब्भावबाहिराइं जा जाणइ अट्टमट्टाइं / गाहा७५९गघ

रअणायरस्स साहेमि णम्मए अज्ज मुक्कदक्खिण्णा / गाहा७६०कख
वेडिसलयाहरंतेण मिलिया जं सि पूरेण / गाहा७६०गघ

रक्खइ अणण्णहियओ जीवं पिव महुअरो पयत्तेण / गाहा७६१कख
दरणेंतदीविदाढग्गसच्छहं मालईमउलं / गाहा७६१गघ

तह णेहलालियाण वि अवाहिरिल्लाण सयलकज्जेसु / गाहा७६२कख
जं कसणं होइ मुहं तं भण्णइ किं पईवाणं / गाहा७६२गघ

तिसिया पियउ त्ति मओ मओ वि तिसिओ मई करेऊण / गाहा७६३कख
इय मयमिहुणं तिसियं पियइ ण सलिलं सिणेहेण / गाहा७६३गघ

तुह सामलि धवलचलंततरलतिक्खग्गलोयणबलेण / गाहा७६४कख
मयणो पुणो वि इच्छइ हरेण सह विग्गहारंभं / गाहा७६४गघ

सुहय सुहं चिय कुडलि व्व पेहुणो णिग्गयस्स चडुवस्स / गाहा७६५कख
जणरंजणिग्गहो ते घरम्मि सुणहो अतिहिवंतो / गाहा७६५गघ

णिवडिहिसि सुण्णहियए जलहरजलपंकिलम्मि मग्गम्मि / गाहा७६६कख
उप्पेक्खागयपिययमहत्थे हत्थं पसारेंती / गाहा७६६गघ

उच्छंगियाĕ पइणा अहिसारणपंकमलिणपेरंते / गाहा७६७कख
आसण्णपरियणो विअ सेअ च्चिय धुवइ से पाए / गाहा७६७गघ

जह लंघेसि परवइं निययवइं भरसहं पि मोत्तूणं / गाहा७६८कख
तह मण्णे कोहलिए अज्जं कल्लं पि फुट्टिहसि / गाहा७६८गघ

अणुसोयइ हलियबहू रइकिरणोलुग्गपंडुरच्छायं / गाहा७६९कख
रण्णुंदुरदंतुक्खुत्तविसमवलियं तिलच्छेत्तं / गाहा७६९गघ

ओवालअम्मि सीआलुआण वइमूलम् उल्लिहंताणं / गाहा७७०कख
दिंभाण कलिंचयवावडाण सुण्णो जलइ अग्गी / गाहा७७०गघ

मा मा मुय परिहासं देअर अणहोरणा वराई सा / गाहा७७१कख
सीयम्मि वि पासिज्जइ पुणो वि एसिं कुणसु छायं / गाहा७७१गघ

किं तस्स पारएणं किम् अग्गिणा किं च गब्भहरएण / गाहा७७२कख
जस्स णिसम्मइ उअरे उण्हायंतत्थणी जाया / गाहा७७२गघ

कमलायराण उण्हो हेमंतो सीअलो जणवयस्स / गाहा७७३कख
को किर भिण्णसहावं जाणइ परमत्थयं लोए / गाहा७७३गघ

हेम.म्ते हिमरअधूसरस्स ओअसरणस्स पहियस्स / गाहा७७४कख
सुमरियजायामुहसिज्जिरस्स सीयं चिय पणट्ठं / गाहा७७४गघ

उवइसइ लडियाण कड्ढेइ रसं ण देइ सोत्तुं जे / गाहा७७५कख
जंतस्स जुव्वणस्स य ण होइ इच्छु च्चिय सहावो / गाहा७७५गघ

बहुएहि जंपिएहिं सिट्ठं अम्ह सवहे करेऊण / गाहा७७६कख
सद्दो च्चिय से भद्दो भोइणिजंते रसो ण त्थि / गाहा७७६गघ

पढमं चिय माहवपट्टयं व घेत्तूण डाहिणो वाओ / गाहा७७७कख
अंकोल्लपढमवत्तं पहिंडिओ गामरच्छासु / गाहा७७७गघ

सो माणो पियमुहअंददंसणे कह थिरो धरिज्जिहइ / गाहा७७८कख
अंकोल्लकोरआण वि जो फुट्टमुहाण बीहेइ / गाहा७७८गघ

कारणगहिओ वि मए माणो एमेअ जं समोसरियो / गाहा७७९कख
अत्थक्कफुल्ल अंकोल्ल तुज्झ तं मत्थए पडउ / गाहा७७९गघ

रंजेह देह रूवं रएह कुसुमाइ देह विच्छित्तिं / गाहा७८०कख
ण वि तह पुहवीसस्स वि हलहलओ जह वसंतस्स / गाहा७८०गघ

सिसिरे वणदवडड्ढं वसंतमासम्मि उअह संभूयं / गाहा७८१कख
मंकुसकण्णसरिच्छं दीसइ पत्तं पलासस्स / गाहा७८१गघ

दूरपइण्णपरिमलं सपल्लवं मुद्धपुप्फपंगुरणं / गाहा७८२कख
अंगच्छित्तं पिव वम्महेण दिण्णं महुसिरीए / गाहा७८२गघ

कारणगहिअं पि इमा माणं मोएइ माणिणिअणस्स / गाहा७८३कख
सहयारमंजरी पियसहि व्व कण्णे समल्लीणा / गाहा७८३गघ

अज्जं चिय छणदिअहो मा पुत्ति रुएहि एहइ पिओ त्ति / गाहा७८४कख
सुण्हं आसासंती पडियत्तमुही रुवइ सासू / गाहा७८४गघ

दियहेदियहे णिवडइ गिहवइधूआणिहेण माउच्छा / गाहा७८५कख
संगहणइ त्ति वावउ वसुहारा खुज्जसहयारे / गाहा७८५गघ

आउच्छणोवऊहणकंठसमोसरियबाहुलइयाए / गाहा७८६कख
वलयाइ पहियचलणे बहूĕ णियलाइ व पडंति / गाहा७८६गघ

उड्डियपासं तणछण्णकंदरं णिहुअसंठियावक्खं / गाहा७८७कख
जूहाहिव परिहर मुहमेत्तसरीयं कल / गाहा७८७गघ

गुणसालिणो वि करिणो होहइ जूहाहिवत्तणं कत्तो / गाहा७८८कख
णवसालिकवललोहिल्लिआĕ विंझं मुअंतस्स / गाहा७८८गघ

विहिणा अणुज्जुएणं पुत्तय जाओ कुलम्मि पढमम्मि / गाहा७८९कख
जाइविसुद्धो भद्दो वि बंधणं पावइ खणम्मि / गाहा७८९गघ

चउपासदिण्णहुयवहविसमाह हवेढणापिउलं / गाहा७९०कख
णिव्वाहेउं जाणइ जूहं जूहाहिवो च्चेव / गाहा७९०गघ

अल्लग्गकवोलेण वि गयमइणा पत्तदसावसणम्मि / गाहा७९१कख
अज्ज वि माĕ सणाहं गयवइजूहं धरंतेण / गाहा७९१गघ

ण वि तह दूमेइ मणं गयस्स बंधो वि करिणिविरहो वि / गाहा७९२कख
दाणविओयविमुहिए जह भमरउले भमंतम्मि / गाहा७९२गघ

गामम्मि मोहणाइं दिण्णे खग्गे व्व चोरहित्थाइं / गाहा७९३कख
गहवइणो णामेणं कियाइ अण्नेण वि जणेण / गाहा७९३गघ

मलिणाइं अंगाइं बाहिरलोएण मंसलुद्धेण / गाहा७९४कख
हिययं हियएण विणा ण देइ वाही भमइ हट्टं / गाहा७९४गघ

कढिणखरवीरपेल्लणहलं व पत्थरविणिग्गयग्गिकणे / गाहा७९५कख
धचलोआयरियवहे कसरा वि सुहेण वच्चंति / गाहा७९५गघ

णक्खमऊहेसु खणं कुसुमेसु खणं खणं किसलएसु / गाहा७९६कख
हत्थेसु खणं कुसुमोच्चियाइ लोडाविया भसला / गाहा७९६गघ

छेत्तम्मि जेण रमिया ताओ किर तस्स चेय मंदेइ / गाहा७९७कख
जइ तीअ इमं णिसुयं फुट्टइ हिययं हरिसयाए / गाहा७९७गघ

हिययं णियामि कढिणं पा हासेण घडियं मे / गाहा७९८कख
विरहाणलेण तत्तं रससित्तं अंतिता फुडह / गाहा७९८गघ

अण्णे ते किल सिहिणो सिणरससेएण हुंति विच्छाया / गाहा७९९कख
आसाइयरससेओ होइ विसेसेण णेहजो दहणो / गाहा७९९गघ

अंतो णिभुअठ्ठिअपरिअणाइ ओरुद्धदारणअणाइ / गाहा८००कख
गिम्हे घोरट्टघग्घररवेण घोरंति व घरट्ट / गाहा८००गघ