अथर्ववेदः/काण्डं ६/सूक्तम् १२८
| ← सूक्तं ६.१२७ | अथर्ववेदः - काण्डं ६ सूक्तं ६.१२८ ऋषिः - अङ्गिराः। |
सूक्तं ६.१२९ → |
| दे. सोमः, शकधूमः। अनुष्टुप्। |
शकधूमं नक्षत्राणि यद्राजानमकुर्वत ।
भद्राहमस्मै प्रायच्छन् इदं राष्ट्रमसादिति ॥१॥
भद्राहं नो मध्यंदिने भद्राहं सायमस्तु नः ।
भद्राहं नो अह्नां प्राता रात्री भद्राहमस्तु नः ॥२॥
अहोरात्राभ्यां नक्षत्रेभ्यः सूर्याचन्द्रमसाभ्याम् ।
भद्राहमस्मभ्यं राजन् छकधूम त्वं कृधि ॥३॥
यो नो भद्राहमकरः सायं नक्तमथो दिवा ।
तस्मै ते नक्षत्रराज शकधूम सदा नमः ॥४॥