गाहासत्तसई द्वितीयशतकम्

गाहासत्तसई

धरिओ धरिओ विअलइ उवएसो पिअसहीहि दिज्जंतो / गाहा१०१कख
मअरद्धअवाणपहारजज्जरे तीअ हिअअम्मि / गाहा१०१गघ

तडसंठिअणीडेक्कंतपीलुआरक्खणेक्कदिण्णमणा / गाहा१०२कख
अगणिअविणिवाअभआ पूरेण समं वहइ काई / गाहा१०२गघ

वहुपुप्फभरोणामिअभूमीगअसाह सुणसु विण्णत्तिं / गाहा१०३कख
गोलाअडविअडकुडंग महुअ सणिअं गलिज्जासु / गाहा१०३गघ

णिप्पच्छिमाइ असई दुक्खालोआइ महुअपुप्फाइं / गाहा१०४कख
चीए वंधुस्स व अट्ठिआइ रुअरी समुच्चिणइ / गाहा१०४गघ

ओ हिअअ मडहसरिआजलरअहीरंतदीहदारु व्व / गाहा१०५कख
ठाणे ठाणे च्चिअ लग्गमाण केणा ऽवि डज्झिहिसि / गाहा१०५गघ

जो तीअ अहरराओ रत्तिं उव्वासिओ पिअअमेण / गाहा१०६कख
सो च्चिअ दीसइ गोसे सवत्तिणअणेसु संकंतो / गाहा१०६गघ

गोलाअडट्ठिअं पेच्छिऊण गहवइसुअं हलिअसोण्हा / गाहा१०७कख
आढत्ता उत्तरिउं दुक्खुत्ताराइ पअवीए / गाहा१०७गघ

चलणोआसणिसण्णस्स तस्स भरिमो अणालवंतस्स / गाहा१०८कख
पाअंगुट्ठावेढिअकेसदढाअड्ढणसुहेल्लिं / गाहा१०८गघ

फालेइ अच्छभल्लं व उअह कुग्गामदेउलद्दारे / गाहा१०९कख
हेमंतआलपहिओ विज्झाअंतं पलालग्गिं / गाहा१०९गघ

कमलाअरा ण मलिआ हंसा उड्डाविआ ण अ पिउच्छा / गाहा११०कख
केण वि गामतडाए अब्भं उत्ताणिअं छूढं / गाहा११०गघ

केण मणे भग्गमणोरहेण संलाविअं पवासो त्ति / गाहा१११कख
सविसाइ व अलसाअंति जेण वहुआइ अंगाइं / गाहा१११गघ

अज्ज वि वालो दामोअरो त्ति इअ जंपिए जसोआए / गाहा११२कख
कण्हमुहपेसिअच्छं णिहुअं हसिअं वअवहूहिं / गाहा११२गघ

ते विरला सप्पुरिसा जाण सिणेहो अहिण्णमुहराओ / गाहा११३कख
अणुदिअह वड्ढमाणो रिणं व पुत्तेसु संकमइ / गाहा११३गघ

णच्चणसलाहणणिहेण पासपरिसंठिआ णिउणगोवी / गाहा११४कख
सरिगोविआण चुंवइ कवोलपडिमागअं कण्हं / गाहा११४गघ

सव्वत्थ दिसामुहपसरिएहि अण्णोण्णकडअलग्गेहिं / गाहा११५कख
छल्लिं व मुअइ विंझो मेहेहि विसंघडंतेहिं / गाहा११५गघ

आलोअंति पुलिंदा पव्वअसिहरट्ठिआ धणुणिसण्णा / गाहा११६कख
हत्थिउलेहि व विंझं पूरिज्जंतं णवब्भेहिं / गाहा११६गघ

वणदवमसिमइलंगो रेहइ विंझो घणेहि धवलेहिं / गाहा११७कख
खीरोअमंथणुच्छलिअदुद्धसित्तो व्व महुमहणो / गाहा११७गघ

वंदीअ णिहअवंधवविमणाइ वि पक्कलो त्ति चोरजुवा / गाहा११८कख
अणुराएण पुलइओ गुणेसु को मच्छरं वहइ / गाहा११८गघ

अज्ज कइमो वि दिअहो वाहवहू रूवजोव्वणुम्मत्ता / गाहा११९कख
सोहग्गं धणुरुंपच्छलेण रच्छासु विक्किरइ / गाहा११९गघ

उक्खिप्पइ मंडलिमारुएण गेहंगणाहि वाहीए / गाहा१२०कख
सोहग्गधअवडाअ व्व उवह धणुरुंपरिंछोली / गाहा१२०गघ

गअगंडत्थलणिहसणमअमइलीकअकरंजसाहाहिं / गाहा१२१कख
एंतीअ कुलघराओ णाअं वाहीअ पइमरणं / गाहा१२१गघ

णववहुपेम्मतनुइओ पणअं पढमघरिणीअ रक्खंतो / गाहा१२२कख
अलिहिअदुप्परिअल्लं पि णेइ रण्णं धणुं वाहो / गाहा१२२गघ

हासाविओ जणो सामलीअ पढमं पसूअमाणाए / गाहा१२३कख
वल्लहवाएण अलं मम त्ति वहुसो भणंतीए / गाहा१२३गघ

कइअवरहिअं पेम्मं ण त्थि च्चिअ मामि माणुसे लोए / गाहा१२४कख
अह होइ कस्स विरहो विरहे होंतम्मि को जिअइ / गाहा१२४गघ

अच्छेरं व णिहिं मिव सग्गे रज्जं व अमअपाणं व / गाहा१२५कख
आसि म्ह तं मुहुत्तं विणिअंसणदंसणं तिस्सा / गाहा१२५गघ

सा तुज्झ वल्लहा तं सि मज्झ वेसो सि तीअ तुज्झ अहं / गाहा१२६कख
वालअ फुडं भणामो पेम्मं किर वहुविआरं ति / गाहा१२६गघ

अहअं लज्जालुइणी तस्स अ उम्मच्छराइ पेम्माइं / गाहा१२७कख
सहिआअणो वि णिउणो अलाहि किं पाअराएण / गाहा१२७गघ

महुमासमारुआहअमहुअरझंकारणिब्भरे रण्णे / गाहा१२८कख
गाइ विरहख्हरावद्धपहिअमणमोहणं गोवी / गाहा१२८गघ

तह माणो माणधणाइ तीअ एमेअ दूरम् अणुवद्धो / गाहा१२९कख
जह से अणुणीअ पिओ एक्कग्गाम च्चिअ पउत्थो / गाहा१२९गघ

सालोअ च्चिअ सूरे घरिणी घरसामिअस्स घेत्तूण / गाहा१३०कख
णेच्छंतस्स वि पाए धुअइ हसंती हसंतस्स / गाहा१३०गघ

वाहरउ मं सहीओ तिस्सा गोत्तेण किं थ भणिएण / गाहा१३१कख
थिरपेम्मा होउ जहिं तहिं पि मा किं पि णं भणह / गाहा१३१गघ

रूअं अच्छीसु ठिअं फरिसो अंगेसु जंपिअं कण्णे / गाहा१३२कख
हिअअं हिअए णिहिअं विओइअं किं थ देव्वेण / गाहा१३२गघ

सअणे चिंतामइअं काऊण पिअं णिमीलिअच्छीए / गाहा१३३कख
अप्पाणो उवऊढो पसिढिलवलआहि वाहाहिं / गाहा१३३गघ

परिभूएण वि दिअहं घरघरभमिरेण अण्णकज्जम्मि / गाहा१३४कख
चिरजीविएण इमिणा खविअ म्हो डड्ढकाएण / गाहा१३४गघ

वसइ जहिं चेअ खलो पोसिज्जंतो सिणेहदाणेहिं / गाहा१३५कख
तं चेअ आलअं दीवओ व्व अइरेण मइलेइ / गाहा१३५गघ

होंती वि णिप्फल च्चिअ धणरिद्धी होइ किविणपुरिसस्स / गाहा१३६कख
गिम्हाअवसंतत्तस्स णिअअछाहि व्व पहिअस्स / गाहा१३६गघ

फुरिए वामच्छि तए जइ एहिइ सो पिओ ज्ज ता सुइरं / गाहा१३७कख
सम्मीलिअ दाहिणअं तुइ अविअण्हं पुलोइस्सं / गाहा१३७गघ

सुणहपउरम्मि गामे हिंडंती तुह कएण सा वाला / गाहा१३८कख
पासअसारि व्व घरंघरेण कइआ वि खज्जिहइ / गाहा१३८गघ

अण्णण्णं कुसुमरसं जं किर सो महइ महुअरो पाउं / गाहा१३९कख
तं णीरसाण दोसो कुसुमाणं णेअ भमरस्स / गाहा१३९गघ

रच्छापइण्णणअणुप्पला तुमं सा पडिच्छए एंतं / गाहा१४०कख
दारणिहिएहि दोहि वि मंगलकलसेहि व थणेहिं / गाहा१४०गघ

ता रुण्णं जा रुव्वइ ता झीणं जाव झिज्जए अंगं / गाहा१४१कख
ता णीससिअ वराईअ जाव सासा पहुप्पंति / गाहा१४१गघ

समसोक्खदुक्खपरिवड्ढिआण कालेण रूढपेम्माण / गाहा१४२कख
मिहुणाण मरइ जं तं खु जिअइ इअरं मुअं होइ / गाहा१४२गघ

हरिहिइ पिअस्स णवचूअपल्लवो पढममंजरिसणाहो / गाहा१४३कख
मा रुअसु पुत्ति पत्थाणकलसमुहसंठिओ गमणं / गाहा१४३गघ

जो कह वि मह सहीहिं छिद्दं लहिऊण पेसिओ हिअए / गाहा१४४कख
सो माणो चोरिअकामुओ व्व दिट्ठे पिए णट्ठो / गाहा१४४गघ

सहिआहि भण्णमाणा थणए लग्गं कुसुंभउप्फं ति / गाहा१४५कख
मुद्धवहुआ हसिज्जइ पप्फोडंती णहवआइं / गाहा१४५गघ

उम्मूलेंति व हिअअं इमाइ रे तुह विरज्जमाणस्स / गाहा१४६कख
अवहीरणवसविस्ãठुलवलंतणअणद्धदिट्ठाइं / गाहा१४६गघ

ण मुअंति दीहसासे ण रुअंति चिरं ण होंति किसिआओ / गाहा१४७कख
धण्णाउ ताउ जाणं वहुवल्लह वल्लहो ण तुमं / गाहा१४७गघ

णिद्दालसपरिघुम्मिरतंसवलंतद्धतारआलोआ / गाहा१४८कख
कामस्स वि दुव्विसहा दिट्ठिणिवाआ ससिमुहीए / गाहा१४८गघ

जीविअसेसाइ मए गमिआ कह कह वि पेम्मदुद्दोली / गाहा१४९कख
एण्हुं विरमसु रे डड्ढ हिअअ मा रज्जसु कहिं पि / गाहा१४९गघ

अज्जाइ णवणहक्खअणिरिक्खणे गरुअजोव्वणुत्तुंगं / गाहा१५०कख
पडिमागअणिअणअणुप्पलच्चिअं होइ थणवट्ठं / गाहा१५०गघ

तं णमह जस्स वच्छे लच्छिमुहं कोत्थुहम्मि संकंतं / गाहा१५१कख
दीसइ मअपरिहीणं ससिविंवं सूरविंव व्व / गाहा१५१गघ

मा कुण पडिवक्खसुहं अणुणेसु पिअं पसाअलोहिल्लं / गाहा१५२कख
अइगहिअगरुअमाणेण पुत्ति रासि व्व झिज्जिहिसि / गाहा१५२गघ

विरहकरवत्तदूसह फालिज्जंतम्मि तीअ हिअअम्मि / गाहा१५३कख
अंसू कज्जलमइलं पमाणसुत्तं व पडिहाइ / गाहा१५३गघ

दुण्णिक्खेवअम् एअं पुत्तअ मा साहसं करिज्जासु / गाहा१५४कख
एत्थ णिहित्ताइ मणे हिअआइ पुणो ण लब्भंति / गाहा१५४गघ

णिव्वुत्तरआ वि वहू सुरअविरामट्ठिइं अआणंती / गाहा१५५कख
अविरअहिअआ अण्णं पि किं पि अत्थि त्ति चिंतेइ / गाहा१५५गघ

णंदंतु सुरअसुहरसतण्हावहराइ सअललोअस्स / गाहा१५६कख
वहुकइअवमग्गविणिम्मिआइ वेसाण पेम्माइं / गाहा१५६गघ

अप्पत्तमण्णुदुक्खो किं मं किसिअ त्ति पुच्छसि हसंतो / गाहा१५७कख
पावसि जा चलचित्तं पिअं जणं ता तुह कहिस्सं / गाहा१५७गघ

अवहत्थिऊण सहिजंपिआइ जाणं कएण रमिओ सि / गाहा१५८कख
एआइ ताइ सोक्खाइ संसओ जेहि जीअस्स / गाहा१५८गघ

ईसालुओ पई से रत्तिं महुअं ण देइ उच्चेउं / गाहा१५९कख
उच्चेइ अप्पण च्चिअ माए अइउज्जुअसहाओ / गाहा१५९गघ

अच्छोडिअवत्थद्धंतपत्थिए मंथरं तुमं वच्च / गाहा१६०कख
चिंतेसि थणहराआसिअस्स मज्झस्स वि ण भंगं / गाहा१६०गघ

उद्धच्छो पिअइ जलं जह जह विरलंगुली चिरं पहिओ / गाहा१६१कख
पावालिआ वि तह तह धारं तणुअं पि तणुएइ / गाहा१६१गघ

भिच्छअरो पेच्छइ णाहिमंडलं सा वि तस्स मुहअंदं / गाहा१६२कख
तं चट्टुअं करंकं दोण्ह वि काआ विलुंपंति / गाहा१६२गघ

जेण विणा ण जिविज्जइ अणुणिज्जइ सो कआवराहो वि / गाहा१६३कख
पत्ते वि णअरडाहे भण कस्स ण वल्लहो अग्गी / गाहा१६३गघ

वंकं को पुलइज्जउ कस्स कहिज्जउ सुहं व दुक्खं व / गाहा१६४कख
केण समं व हसिज्जउ पामरपउरे हअग्गामे / गाहा१६४गघ

फलहीवाहणपुण्णाहमंगलं लंगले कुणंतीए / गाहा१६५कख
असईअ मणोरहगब्भिणीअ हत्था थरहरंति / गाहा१६५गघ

पहिउल्लूरणसंकाउलाहि असईहि वहलतिमिरस्स / गाहा१६६कख
आइप्पणेण णिहुअं वडस्स सित्ताइ पत्ताइं / गाहा१६६गघ

भंजंतस्स वि तुह सग्गगामिणो णइकरंजसाहाओ / गाहा१६७कख
पाआ अज्ज वि धम्मिअ तुह कह धरणिं चिअ छिवंति / गाहा१६७गघ

अच्छउ दाव मणहरं पिआइ मुहदंसणं अइमहग्घं / गाहा१६८कख
तग्गामछेत्तसीमा वि झत्ति दिट्ठा सुहावेइ / गाहा१६८गघ

णिक्कम्माहि वि छेत्ताहि पामरो णेअ वच्चए वसहिं / गाहा१६९कख
मुअपिअजाआसुण्णइअगेहदुक्खं परिहरंतो / गाहा१६९गघ

झंझावाउत्तिणघरविवरपलोट्टंतसलिलधाराहिं / गाहा१७०कख
कुड्डलिहिओहिदिअहं रक्खइ अज्जा करअलेहिं / गाहा१७०गघ

गोलाणईअ कच्छे चक्खंतो राइआइ पत्ताइं / गाहा१७१कख
उप्फडइ मक्कडो खोक्खेइ अ पोट्टं च पिट्टेइ / गाहा१७१गघ

गहवइणा मुअसेइहडुंडुमदामं चिरं वहेऊण / गाहा१७२कख
वग्गसआइं णेऊण णवरि अज्जाहरे वद्धं / गाहा१७२गघ

सिहिपेहुणावअंसा वहुआ वाहस्स गव्विरी भमइ / गाहा१७३कख
गअमोत्तिअरइअपसाहणाण मज्झे सवत्तीण / गाहा१७३गघ

वंकच्छिपेच्छिरीणं वंकुल्लविरीण वंकभमिरीणं / गाहा१७४कख
वंकहसिरीण पुत्तअ पुण्णेहि जणो पिओ होइ / गाहा१७४गघ

भम धम्मिअ वीसद्धो सो सुणहो अज्ज मारिओ तेण / गाहा१७५कख
गोलाअडविअडकुडुंगवासिणा दरिअसीहेण / गाहा१७५गघ

वाएरिएण भरिअं अच्छिं कण्णरइउप्पलरएण / गाहा१७६कख
फुक्कंतो अविअण्हं चुंवंतो को सि देव्वाणं / गाहा१७६गघ

सहि दुम्मेंति कलंवाइं जह मं तह ण सेसकुसुमाइं / गाहा१७७कख
णूणं इमेसु दिअहेसु वहइ गुलिआधणुं कामो / गाहा१७७गघ

णा ऽहं दूई ण तुमं पिओ त्ति को अम्ह एत्थ वावारो / गाहा१७८कख
सा मरइ तुज्झ अअसो एअं धम्मक्खरं भणिमो / गाहा१७८गघ

तीअ मुहाहि तुह मुहं तुज्झ मुहाओ अ मज्झ चलणम्मि / गाहा१७९कख
हत्थाहत्थीअ गओ अइदुक्करकारओ तिलओ / गाहा१७९गघ

सामाइ सामलिज्जइ अद्धच्छिपलोइरीअ मुहसोहा / गाहा१८०कख
जंवूदलकअकण्णावअंसभमिरे हलिअउत्ते / गाहा१८०गघ

दूइ तुमं चिअ कुसला कक्खडमउआइ जाणसे वोत्तुं / गाहा१८१कख
कंडूइपंडरं जह ण होइ तह तं करेज्जासु / गाहा१८१गघ

महिलासहस्सभरिए तुह हिअए सुहअ सा अमाअंती / गाहा१८२कख
दिअहं अणण्णकम्मा अंगं तणुअं पि तणुएइ / गाहा१८२गघ

खणमेत्तं पि ण फिट्टइ अणुदिअह विइण्णगरुअसंतावा / गाहा१८३कख
पच्छण्णपावसंक व्व सामली मज्झ हिअआओ / गाहा१८३गघ

अण्णुअ णा ऽहं कुविआ उवऊहसु किं मुहा पसाएसि / गाहा१८४कख
तुह मण्णुसमुप्पाएण मज्झ माणेण वि ण कज्जं / गाहा१८४गघ

दीहुण्हपउरणीसासपअविओ वाहसलिलपरिसित्तो / गाहा१८५कख
साहेइ सामसवलं व तीअ अहरो तुह विओए / गाहा१८५गघ

सरए महद्दहाणं अंतोसिसिराइ वाहिरुण्हाइं / गाहा१८६कख
जाआइ कुविअसज्जणहिअअसरिच्छाइ सलिलाइं / गाहा१८६गघ

आअस्स किं णु काहं किं वोच्छं कह णु होहिइ इमं ति / गाहा१८७कख
पढमुग्गअसाहसआरिआइ हिअअं थरहरेइ / गाहा१८७गघ

णेउरकोडिविलग्गं चिउरं दइअस्स पाअपडिअस्स / गाहा१८८कख
हिअअं पउत्थमाणं उम्मोअंति च्चिअ कहेइ / गाहा१८८गघ

तुज्झ ऽंगराअसेसेण सामली तह खरेण सोमारा / गाहा१८९कख
सा किर गोलातूहे ण्हाआ जंवूकसाएण / गाहा१८९गघ

अज्जं चेअ पउत्थो अज्जं चिअ सुण्णआइ जाआइं / गाहा१९०कख
रच्छामुहदेउलचच्चराइ अम्हं च हिअआइं / गाहा१९०गघ

चिरिडिं पि अआणंता लोआ लोएहि गोरवब्भहिआ / गाहा१९१कख
सोणारतुल व्व णिरक्खरा वि खंधेहि वुब्भंति / गाहा१९१गघ

आअंवंतकवोलं खलिअक्खरजंपिरिं फुरंतोट्ठिं / गाहा१९२कख
मा छिवसु त्ति सरोसं समोसरंतिं पिअं भरिमो / गाहा१९२गघ

गोलाविसमोआरच्छलेण अप्पा उरम्मि से मुक्को / गाहा१९३कख
अणुअंपाणिद्दोसं तेण वि सा गाढम् उवऊःा / गाहा१९३गघ

सा तइ सहत्थदिण्णं अज्ज वि रे सुहअ गंधरहिअं पि / गाहा१९४कख
उव्वसिअणअरघरदेवअ व्व ओमालिअं वहइ / गाहा१९४गघ

केलीअ वि रूसेउं ण तीरए तम्मि चुक्कविणअम्मि / गाहा१९५कख
जाइअएहि वि माए इमेहि अवसेहि अंगेहिं / गाहा१९५गघ

उप्फुल्लिआइ खेलउ मा णं वारेहि होउ परिखामा / गाहा१९६कख
मा जहणभारगरुई पुरिसाअंती किलिम्मिहइ / गाहा१९६गघ

पउरजुआणो गामो महुमासो जोव्वणं पई ठेरो / गाहा१९७कख
जुण्णसुरा साहीणा असई मा होउ किं मरउ / गाहा१९७गघ

वहुसो वि कहिज्जंतं तुह वअणं मज्झ हत्थसंदिट्ठं / गाहा१९८कख
ण सुअं ति जंपमाणा पुणरुत्तसअं कुणइ अज्जा / गाहा१९८गघ

पाअडिअणेहसब्भावणिब्भरं तीअ जह तुमं दिट्ठो / गाहा१९९कख
संवरणवावडाए अण्णो वि जणो तह च्चेअ / गाहा१९९गघ

गेण्हह पुलोअह इमं पहसिअवअणा पइस्स अप्पेइ / गाहा२००कख
जाआ सुअपढमुब्भिण्णदंतजुअलंकिअं वोरं / गाहा२००गघ