सामवेदः/कौथुमीया/संहिता/उत्तरार्चिकः/2.7 सप्तमप्रपाठकः/2.7.3 तृतीयोऽर्द्धः

१
अभि त्वा पूर्वपीतय इन्द्र स्तोमेभिरायवः | समीचीनास ऋभवः समस्वरन्रुद्रा गृणन्त पूर्व्यं || १५७३ ||	१अ १छ्
अस्येदिन्द्रो वावृधे वृष्ण्यं शवो मदे सुतस्य विष्णवि | अद्या तमस्य महिमानमायवोऽनु ष्टुवन्ति पूर्वथा || १५७४ ||	२अ २छ्
२
प्र वामर्चन्त्युक्थिनो नीथाविदो जरितारः | इन्द्राग्नी इष आ वृणे || १५७५ ||	१अ १छ्
इन्द्राग्नी नवतिं पुरो दासपत्नीरधूनुतं | साकमेकेन कर्मणा || १५७६ ||	२अ २छ्
इन्द्राग्नी अपसस्पर्युप प्र यन्ति धीतयः | ऋतस्य पथ्याऽऽ३ अनु || १५७७ ||	३अ ३छ्
इन्द्राग्नी तविषाणी वां सधस्थानि प्रयांसि च | युवोरप्तूर्यं हितं || १५७८ ||	४अ ४छ्
३
शग्ध्यू३ षु शचीपत इन्द्र विश्वाभिरूतिभिः | भगं न हि त्वा यशसं वसुविदमनु शूर चरामसि || १५७९ ||	१अ १छ्
पौरो अश्वस्य पुरुकृद्गवामस्युत्सो देव हिरण्ययः | न किर्हि दानं परि मर्धिषत्वे यद्यद्यामि तदा भर || १५८० ||	२अ २छ्
४
त्वं ह्येहि चेरवे विदा भगं वसुत्तये | उद्वावृषस्व मधवन्गविष्टय उदिन्द्राश्वमिष्टये || १५८१ ||	१अ १छ्
त्वं पुरू सहस्राणि शतानि च यूथा दानाय मंहसे | आ पुरन्दरं चकृम विप्रवचस इन्द्रं गायन्तोऽवसे || १५८२ ||	२अ २छ्
५
यो विश्वा दयते वसु होता मन्द्रो जनानां | मधोर्न पात्रा प्रथमान्यस्मै प्र स्तोमा यन्त्वग्नये || १५८३ ||	१अ १छ्
अश्व न गीर्भी रथ्यं सुदानवो मर्मृज्यन्ते देवयवः | उभे तोके तनये दस्म विस्पते पर्षि राधो मघोनां || १५८४ ||	२अ २छ्
६
इमं मे वरुण श्रुधी हवमद्या च मृडय | त्वामवस्युरा चके || १५८५ ||	१अ १छ्
७
कया त्वं न ऊत्याभि प्र मन्दसे वृषन् | कया स्तोतृभ्य आ भर || १५८६ ||	१अ १छ्
८
इन्द्रमिद्देवतातय इन्द्रं प्रयत्यध्वरे | इन्द्रं समीके वनिनो हवामह इन्द्रं धनस्य सातये || १५८७ ||	१अ १छ्
इन्द्रो मह्ना रोदसी पप्रथच्छव इन्द्रः सूर्यमरोचयत् | इन्द्रे ह विश्वा भुवनानि येमिर इन्द्रे सुवानास इन्दवः || १५८८ ||	२अ २छ्
९
विश्वकर्मन्हविषा वावृधानः स्वयं यजस्व तन्वा३ं स्वा हि ते | मुह्यन्त्वन्ये अभितो जनास इहास्माकं मघवा सूरिरस्तु || १५८९ ||	१अ १छ्
१०
अया रुचा हरिण्या पुनानो विश्वा द्वेषांसि तरति सयुग्वभिः सूरो न सयुग्वभिः | धारा पृष्ठस्य रोचते पुनानो अरुषो हरिः | विश्वा यद्रूपा परियास्यृक्वभिः सप्तास्येभिरृक्वभिः || १५९० ||	१अ १छ् १ए
प्राचीमनु प्रदिशं पाति चेकितत्सं रश्मिभिर्यतते दर्शतो रथो दैव्यो दर्शतो रथः | अग्मन्नुक्थानि प्ॐस्येन्द्रं जैत्राय हर्षयत | वज्रश्च यद्भवथो अनपच्युता समत्स्वनपच्युता || १५९१ ||	२अ २छ् २ए
त्वं ह त्यत्पणीनां विदो वसु सं मातृभिर्मर्जयसि स्व आ दम ऋतस्य धीतिभिर्दमे | परावतो न साम तद्यत्रा रणन्ति धीतयः | त्रिधातुभिररुषीभिर्वयो दधे रोचमानो वयो दधे | १५९२ ||	३अ ३छ् ३ए
११
उत नो गोषणिं धियमश्वसां वाजसामुत | नृवत्कृणुह्यूतये || १५९३ ||	१अ १छ्
१२
शशमानस्य वा नरः स्वेदस्य सत्यशवसः | विदा कामस्य वेनतः || १५९४ ||	१अ १छ्
१३
उप नः सूनवो गिरः शृण्वन्त्वमृतस्य ये | सुमृडीका भवन्तु नः || १५९५ ||	१अ १छ्
१४
प्र वां महि द्यवी अभ्युपस्तुतिं भरामहे | शुची उप प्रशस्तये || १५९६ ||	१अ १छ्
पुनाने तन्वा मिथः स्वेन दक्षेण राजथः | ऊह्याथे सनादृतं || १५९७ ||	२अ २छ्
मही मित्रस्य साधथस्तरन्ती पिप्रती ऋतं | परि यज्ञं नि षेदथुः || १५९८ ||	३अ ३छ्
१५
अयमु ते समतसि कपोत इव गर्भधिं | वचस्तच्चिन्न ओहसे || १५९९ ||	१अ १छ्
स्तोत्रं राधानां पते गिर्वाहो वीर यस्य ते | विभूतिरस्तु सूनृता || १६०० ||	२अ २छ्
ऊर्ध्वस्तिष्ठा न ऊतयेऽस्मिन्वाजे शतक्रतो | समन्येषु ब्रवावहै || १६०१ ||	३अ ३छ्
१६
गाव उप वदावटे महि यज्ञस्य रप्सुदा | उभा कर्णा हिरण्यया || १६०२ ||	१अ १छ्
अभ्यारमिदद्रयो निषिक्तं पुष्करे मधु | अवटस्य विसर्जने || १६०३ ||	२अ २छ्
सिञ्चन्ति नमसावटमुच्चाचक्रं परिज्मानं | नीचीनबारमक्षितं || १६०४ ||	३अ ३छ्
१७
मा भेम मा श्रमिष्मोग्रस्य सख्ये तव | महत्ते वृष्णो अभिचक्ष्यं कृतं पश्येम तुर्वशं यदुं || १६०५ ||	१अ १छ्
सव्यामनु स्फिग्यं वावसे वृष्ना न दानो अस्य रोषति | मध्वा संपृक्ताः सारघेण धेनवस्तूयमेहि द्रवा पिब || १६०६ ||	२अ २छ्
१८
इमा उ त्वा पुरूवसो गिरो वर्धन्तु या मम | पावकवर्णाः शुचयो विपश्चितोऽभि स्तोमैरनूषत || १६०७ ||	१अ १छ्
अयं सहस्रमृषिभिः सहस्कृतः समुद्र इव पप्रथे | सत्यः सो अस्य महिमा गृणे शवो यज्ञेषु विप्रराज्ये || १६०८ ||	२अ २छ्
१९
यस्यायं विश्व आर्यो दासः शेवधिपा अरिः | तिरश्चिदर्ये रुशमे पवीरवि तुभ्येत्सो अज्यते रयिः || १६०९ ||	१अ १छ्
तुरण्यवो मधुमन्तं घृतश्चतं विप्रासो अर्कमानृचुः | अस्मे रयिः पप्रथे वृष्ण्यं शवोऽस्मे स्वानास इन्दवः || १६१० ||	२अ २छ्
२०
गोमन्न इन्दो अश्ववत्सुतः सुदक्ष धनिव | शुचिं च वर्णमधि गोषु धार्य || १६११ ||	१अ १छ्
स नो हरीणां पत इन्दो देवप्सरस्तमः | सखेव सख्ये नर्यो रुचे भव || १६१२ ||	२अ २छ्
सनेमि त्वमस्मदा अदेवं कं चिदत्रिणं | साह्वां इन्दो परि बाधो अप द्वयुं || १६१३ ||	३अ ३छ्
२१
अञ्जते व्यञ्जते समञ्जते क्रतुं रिहन्ति मध्वाभ्यञ्जते | सिन्धोरुऽच्छ्वासे पतयन्तमुक्षणं हिरण्यपावाः पशुमप्सु गृभ्णते || १६१४ ||	१अ १छ्
विपश्चिते पवमानाय गायत मही न धारात्यन्धो अर्षति | अहिर्न जूर्णामति सर्पति त्वचमत्यो न क्रीडन्नसरद्वृषा हरिः || १६१५ ||	२अ २छ्
अग्रेगो राजाप्यस्तविष्यते विमानो अह्नां भुवनेष्वर्पितः | हरिर्घृतस्नुः सुदृशीको अर्णवो ज्योतीरथः पवते राय ओक्यः || १६१६ ||	३अ ३छ्