सामवेदः/कौथुमीया/संहिता/उत्तरार्चिकः/2.1 प्रथमप्रपाठकः/2.1.1 प्रथमोऽर्द्धः

१
उपास्मै गायता नरः पवमानायेन्दवे | अभि देवां इयक्षते || ६५१ ||	१अ १छ्
अभि ते मधुना पयोऽथर्वाणो अशिश्रयुः | देवं देवाय देवयु || ६५२ ||	२अ २छ्
स नः पवस्व शं गवे शं जनाय शमर्वते | शं राजन्नोषधीभ्यः || ६५३ ||	३अ ३छ्
२
दविद्युतत्या रुचा परिष्टोभन्त्या कृपा | सोमाः शुक्रा गवाशिरः || ६५४ ||	१अ १छ्
हिन्वानो हेतृभिर्हित आ वाजं वाज्यक्रमीत् | सीदन्तो वनुषो यथा || ६५५ ||	२अ २छ्
ऋधक्सोम स्वस्तये संजग्मानो दिवा कवे | पवस्व सूर्यो दृशे || ६५६ ||	३अ ३छ्
३
पवमानस्य ते कवे वाजिन्त्सर्गा असृक्षते | अर्वन्तो न श्रवस्यवः || ६५७ ||	१अ १छ्
अच्छा कोशं मधुश्चुतमसृग्रं वारे अव्यये | अवावशन्त धीतयः || ६५८ ||	२अ २छ्
अच्छा समुद्रमिन्दवोऽस्तं गावो न धेनवः | अग्मन्नृतस्य योनिमा || ६५९ ||	३अ ३छ्
४
अग्न आ याहि वीतये गृणानो हव्यदातये | नि होता सत्सि बर्हिषि || ६६० ||	१अ १छ्
तं त्वा समिद्भिरङ्गिरो घृतेन वर्धयामसि | बृहच्छोचा यविष्ठ्य || ६६१ ||	२अ २छ्
स नः पृथु श्रवाय्यमच्छा देव विवाससि | बृहदग्ने सुवीर्यं || ६६२ ||	३अ ३छ्
५
आ नो मित्रावरुणा घृतैर्गव्यूतिमुक्षतं | मध्वा रजांसि सुक्रतू || ६६३ ||	१अ १छ्
उरुशंसा नमोवृधा मह्ना दक्षस्य राजथः | द्राघिष्ठाभिः शुचिव्रता || ६६४ ||	२अ २छ्
गृणाना जमदग्निना योनावृतस्य सीदतं | पातं सोममृतावृधा || ६६५ ||	३अ ३छ्
६
आ याहि सुषुमा हि त इन्द्र सोमं पिबा इमं | एदं बर्हिः सदो मम || ६६६ ||	३अ ३छ्
आ त्वा ब्रह्मयुजा हरी वहतामिन्द्र केशिना | उप ब्रह्माणि नः शृणु || ६६७ ||	३अ ३छ्
ब्रह्माणस्त्वा युजा वयं सोमपामिन्द्र सोमिनः | सुतावन्तो हवामहे || ६६८ ||	३अ ३छ्
७
इन्द्राग्नी आ गतं सुतं गीर्भिर्नभो वरेण्यं | अस्य पातं धियेषिता || ६६९ ||	१अ १छ्
इन्द्राग्नी जरितुः सचा यज्ञो जिगाति चेतनः | अया पातमिमं सुतं || ६७० ||	२अ २छ्
इन्द्रमग्निं कविच्छदा यज्ञस्य जूत्या वृणे | ता सोमस्येह तृम्पतां || ६७१ ||	३अ ३छ्
८
उच्चा ते जातमन्धसो दिवि सद्भूम्या ददे | उग्रं शर्म महि श्रवः || ६७२ ||	१अ १छ्
स न इन्द्राय यज्यवे वरुणाय मरुद्भ्यः | वरिवोवित्परि स्रव || ६७३ ||	२अ २छ्
एना विश्वान्यर्य आ द्युम्नानि मानुषाणां | सिषासन्तो वनामहे || ६७४ ||	३अ ३छ्
९
पुनानः सोम धारयापो वसानो अर्षसि | आ रत्नधा योनिमृतस्य सीदस्युत्सो देवो हिरण्ययः || ६७५ ||	१अ १छ्
दुहान ऊधर्दिव्यं मधु प्रियं प्रत्नं सधस्थमासदत् | आपृच्छ्यं धरुणं वाज्यर्षसि नृभिर्धौतो विचक्षणः || ६७६ ||	२अ २छ्
१०
प्र तु द्रव परि कोशं नि षीद नृभिः पुनानो अभि वाजमर्ष | अश्वं न त्वा वाजिनं मर्जयन्तोऽच्छा बर्ही रशनाभिर्नयन्ति || ६७७ ||	१अ १छ्
स्वायुधः पवते देव इन्दुरशस्तिहा वृजना रक्षमाणः | पिता देवानां जनिता सुदक्षो विष्टम्भो दिवो धरुणः पृथिव्याः || ६७८ ||	२अ २छ्
ऋषिर्विप्रः पुरएता जनानामृभुर्धीर उशना काव्येन | स चिद्विवेद निहितं यदासामपीच्या३ं गुह्यं नाम गोनां || ६७९ ||	३अ ३छ्
११
अभि त्वा शूर नोनुमोऽदुग्धा इव धेनवः | ईशानमस्य जगतः स्वर्दृशमीशानमिन्द्र तस्थुषः || ६८० ||	१अ १छ्
न त्वावां अन्यो दिव्यो न पार्थिवो न जातो न जनिष्यते | अश्वायन्तो मघवन्निन्द्र वाजिनो गव्यन्तस्त्वा हवामहे || ६८१ ||	२अ २छ्
१२
कया नश्चित्र आ भुवदूती सदावृधः सखा | कया शचिष्ठया वृता || ६८२ ||	१अ १छ्
कस्त्वा सत्यो मदानां मंहिष्ठो मत्सदन्धसः | दृढा चिदारुजे वसु || ६८३ ||	२अ २छ्
अभी षु णः सखीनामविता जरित्ऱीणां | शतं भवास्यूतये || ६८४ ||	३अ ३छ्
१३
तं वो दस्ममृतीषहं वसोर्मन्दानमन्धसः | अभि वत्सं न स्वसरेषु धेनव इन्द्रं गीर्भिर्नवामहे || ६८५ ||	१अ १छ्
द्युक्षं सुदानुं तविषीभिरावृतं गिरिं न पुरुभोजसं | क्षुमन्तं वाजं शतिनं सहस्रिणं मक्षू गोमन्तमीमहे || ६८६ ||	२अ २छ्
१४
तरोभिर्वो विदद्वसुमिन्द्रं सबाध ऊतये | बृहद्गायन्तः सुतसोमे अध्वरे हुवे भरं न कारिणं || ६८७ ||	१अ १छ्
न यं दुध्रा वरन्ते न स्थिरा मुरो मदेषु शिप्रमन्धसः | य आदृत्या शशमानाय सुन्वते दाता जरित्र उक्थ्यं || ६८८ ||	२अ २छ्
१५
स्वादिष्ठया मदिष्ठया पवस्व सोम धारया | इन्द्राय पातवे सुतः || ६८९ ||	१अ १छ्
रक्षोहा विश्वचर्षणिरभि योनिमयोहते | द्रोणे सधस्थमासदत् ||६९० ||	२अ २छ्
वरिवोधातमो भुवो मंहिष्ठो वृत्रहन्तमः | पर्षि राधो मघोनां || ६९१ ||	३अ ३छ्
१६
पवस्व मधुमत्तम इन्द्राय सोम क्रतुवित्तमो मदः | महि द्युक्षतमो मदः || ६९२ ||	१अ १छ्
यस्य ते पीत्वा वृषभो वृषायतेऽस्य पीत्वा स्वर्विदः | स सुप्रकेतो अभ्यक्रमीदिषोऽच्छा वाजं नैतशः || ६९३ ||	२अ २छ्
१७
इन्द्रमच्छ सुता इमे वृषणं यन्तु हरयः | श्रुष्टे जातास इन्दवः स्वर्विदः || ६९४ ||	१अ १छ्
अयं भराय सानसिरिन्द्राय पवते सुतः | सोमो जैत्रस्य चेतति यथा विदे || ६९५ ||	२अ २छ्
अस्येदिन्द्रो मदेष्वा ग्राभं गृभ्णाति सानसिं | वज्रं च वृषणं भरत्समप्सुजित् ||६९६ ||	३अ ३छ्
१८
पुरोजिती वो अन्धसः सुताय मादयित्नवे | अप श्वानं श्नथिष्टन सखायो दीर्घजिह्व्यं || ६९७ ||	१अ १छ्
यो धारया पावकया परिप्रस्यन्दते सुतः | इन्दुरश्वो न कृत्व्यः || ६९८ ||	२अ २छ्
तं दुरोषमभी नरः सोमं विश्वाच्या धिया | यज्ञाय सन्त्वद्रयः || ६९९ ||	३अ ३छ्
१९
अभि प्रियाणि पवते चनोहितो नामानि यह्वो अधि येषु वर्धते | आ सूर्यस्य बृहतो बृहन्नधि रथं विष्वञ्चमरुहद्विचक्षणः ||७०० ||	१अ १छ्
ऋतस्य जिह्वा पवते मधु प्रियं वक्ता पतिर्धियो अस्या अदाभ्यः | दधाति पुत्रः पित्रोरपीच्या३ं नाम तृतीयमधि रोचनं दिवः || ७०१ ||	२अ २छ्
अव द्युतानः कलशां अचिक्रदन्नृभिर्येमाणः कोश आ हिरण्यये | अभी ऋतस्य दोहना अनूषताधि त्रिपृष्ठ उषसो वि राजसि || ७०२ ||	३अ ३छ्
२०
यज्ञायज्ञा वो अग्नये गिरागिरा च दक्षसे | प्रप्र वयममृतं जातवेदसं प्रियं मित्रं न शंसिषं || ७०३ ||	१अ १छ्
ऊर्जो नपातं स हिनायमस्मयुर्दाशेम हव्यदातये | भुवद्वाजेष्वविता भुवद्वृध उत त्राता तनूनां || ७०४ ||	२अ २छ्
२१
एह्यू षु ब्रवाणि तेऽग्न इत्थेतरा गिरः | एभिर्वर्धास इन्दुभिः || ७०५ ||	१अ १छ्
यत्र क्व च ते मनो दक्षं दधस उत्तरं | तत्रा योनिं कृणवसे || ७०६ ||	२अ २छ्
न हि ते पूर्तमक्षिपद्भुवन्नेमानां पते | अथा दुवो वनवसे || ७०७ ||	३अ ३छ्
२२
वयमु त्वामपूर्व्य स्थूरं न कच्चिद्भरन्तोऽवस्यवः | वज्रिञ्चित्रं हवामहे || ७०८ ||	१अ १छ्
उप त्वा कर्मन्नूतये स नो युवोग्रश्चक्राम यो धृषत् | त्वामिध्यवितारं ववृमहे सखाय इन्द्र सानसिं || ७०९ ||	२अ २छ्
२३
अधा हीन्द्र गिर्वण उप त्वा काम ईमहे ससृग्महे | उदेव ग्मन्त उदभिः || ७१० ||	१अ १छ्
वार्ण त्वा यव्याभिर्वर्धन्ति शूर ब्रह्माणि | ववृध्वांसं चिदद्रिवो दिवेदिवे || ७११ ||	२अ २छ्
पुञ्जन्ति हरी इषिरस्य गाथयोरौ रथ उरुयुगे वचोयुजा | इन्द्रवाहा स्वर्विदा || ७१२ ||	३अ ३छ्