सत्कर्मसन्ततिर्या तु ज्ञानविज्ञानसंयुता ।
अपरोक्षदृश चापि भक्तिश्रद्धाविरक्तिभिः ॥ १९
पुंसः कैवल्यदा सा हि क्रमेण सुकृतात्मनः ।
दृष्टश्रुतानुभावा ये देवाश्च ऋषयस्तथा ।
विशुद्ध्यर्थं प्रकुर्वन्ति सत्क्षेत्रस्यानुवर्तनम् ॥ २०
भक्तिश्रद्धाविहीनानां मनुष्याणान्तु का कथा ! ।
लब्धविद्याधिकारश्च सत्सङ्गत्यागसंयुतः ॥ २१
यः शृण्वन् श्रावयश्चापि सतां सङ्गेन संयुतः।
तीर्थवैभवमाकर्ण्य संयुक्तेनैव निर्वृतः॥ २२
तीर्थयात्रां प्रकुर्वीत भक्तिश्रद्धासमन्वितः ।।
तेन निर्धूतपापः सन् स याति परमां गतिम् ॥ २३
यत्र यत्र त्वया कार्या तीर्थयात्रा क्षितीश्वर ! ।
तत्रानेन विधानेन प्रीणयस्व जनार्दनम् ॥ २४
त्वदीयधनधान्यादीन् भक्त्या कुरु समर्पितान् ।
वेङ्कटेशस्य यात्रां वै कुरु नित्यमतन्द्रितः ॥ २५
इति श्रीब्रह्मपुराणे श्रीवेङ्कटाचलमाहात्म्ये तीर्थयात्राप्रकार-
वर्णनं नाम नवमोऽध्यायः ।