पृष्ठम्:शङ्कराचार्यविरचितानि स्तोत्राणि (द्वितीयः भागः).pdf/२५

विकिस्रोतः तः
पुटमेतत् सुपुष्टितम्

॥ श्री ।।

॥ लक्ष्मीनृसिंहकरुणारसस्तोत्रम् ॥


श्रीमत्पयोनिधिनिकेतनचक्रपाणे
 भोगीन्द्रभाेगमणिराजितपुण्यमूर्ते ।
योगीश शाश्वत शरण्य भवाब्धिपोत
 लक्ष्मीनृसिंह मम देहि करावलम्बम् ॥ १ ॥

ब्रह्मेन्द्ररुद्रमरुदर्ककिरीटकोटि-
 संघट्टिताङ्घ्रिकमलामलकान्तिकान्त ।
लक्ष्मीलसत्कुचसरोरुहराजहंस
 लक्ष्मीनृसिंह मम देहि करावलम्बम् ॥ २ ॥

संसारदावदहनाकरभीकरोरु-
 ज्वालावलीभिरतिदग्धतनूरहस्य ।
त्वत्पादपद्मसरसीरुहमागतस्य
 लक्ष्मीनृसिंह मम देहि करावलम्बम् ॥ ३ ॥