स्वामितीर्थमध्यगतधनदादिनवतीर्थवर्णनम्
ततो निषादं तं प्राह किटिरूपी हरिः स्वयम् ।
पूर्वं सेव्यं विमानं मे तीर्थञ्च श्रीनिवासतः ।
ततःप्रभृति तत्तीर्थं पूर्वं सेव्यं बभूव ह ॥ ३२
उत्तरे धनदं तीर्थं धनदेन विनिर्मितम् ।
यत्र स्नात्वाऽघनिर्मुक्तो धनसम्पदमाप्नुयात् ॥ ३३
ऐशान्यां गालवं तीर्थं गालवेन विनिर्मितम् ।
तत्र स्नात्वा च पीत्वा च भुक्तिं मुक्तिञ्च विन्दति ॥ ३४
मार्कण्डेय पूर्वभागे मार्कण्डेयविनिर्मितम् ।
तत्र स्नान्ति नरा ये तु तेषामायुः प्रवर्धते ॥ ३५
अग्निना निर्मितं तीर्थमाग्नेय्यां पापमोचनम् ।
दक्षिणे यमतीर्थन्तु नरकोत्तारकरणम् ॥ ३६
वसिष्ठनिर्मितं तीर्थं राक्षसं त्वृणमोचनम् ।
वारुणे वायुतीर्थञ्च सद्यः कैवल्यदायकम् ॥ ३७
मध्ये सरस्वतीतीर्थं महापातकनाशनम् ।
य एषु नवतीर्थेषु स्नानमेकदिने नरः ॥ ३८
कृत्वा पश्येच्छ्रीनिवासं न पुनर्जायते तु सः ।
स्वामिपुष्करिणीस्नानं श्रीनिवासस्य दर्शनम् ॥ ३९
सहस्रनामपठनं नाल्पस्य तपसः फलम् ।
अस्नातुर्नवतीर्थे तु वराहञ्चाप्यपश्यतः ॥ ४०
सर्वं निष्फलतां याति श्रीनिवासो न तुष्यति ।
फलं धर्मादिकञ्चैव न यच्छति नृणां विभुः ॥ ४१
पा. 3.